И оваа година, скопската Зоолошката градина започнува со кампањата „Стоп за петарди и огномет“. Оттаму велат дека целта е новогодишните празници да бидат симбол на радост, топлина и заедништво, а не да значат страв, паника и сериозна опасност поради огнометите.
Од Зоолошката градина апелираат да не се користат огнометите бидејќи животните имаат многу поосетлив слух од луѓето, па гласните и ненадејни експлозии предизвикуваат екстремен стрес, панични реакции и дезориентација.
– Домашните миленици бегаат, се повредуваат или добиваат трајни трауми. Дивите животни и птиците ги напуштаат своите живеалишта, често завршувајќи повредени или загинати. Во зоолошките градини, животните трпат сериозен стрес кој може да влијае на нивното здравје, апетит и однесување – појаснуваат од Зоолошката.
Оттаму додаваат дека петардите и огнометите се опасни и за децата.
– Петардите се експлозивни средства, доволно е една секунда невнимание која може да резултира со тешки повреди на рацете, лицето или на слухот. Секоја година се регистрираат бројни несреќи со деца, со трајни последици. Гласните детонации предизвикуваат страв, анксиозност и нарушен сон кај многу дечиња – нагласуваат од ЗОО.
Во име на оние што не можат да зборуваат, ЗОО повикува на одговорност, хуманост и емпатија.
– Да кажеме стоп за петарди и огномет, празниците може да бидат убави и без бучава и детонации – повикуваат од Зоолошката.
