Седумкратниот светски шампион сè уште се мачи со новиот болид на Ферари, а експерт однатре ги посочува техничките причини за неговите слаби перформанси. Сè укажува на сериозно несовпаѓање помеѓу болидот SF-25 и стилот на возење на Хамилтон.
Доаѓањето на Хамилтон во Ферари беше вистински шок за светот на Формула 1, кој веднаш сонуваше за многу работи, но досега, неговото доаѓање не се исплати ниту за тимот, ниту за возачот.
Британецот не се чувствува удобно во SF-25 и никогаш не успева да го пронајде вистинското темпо, додека неговиот тимски колега Шарл Леклер редовно завршува пред него.
Досега, Хамилтон собра 41 поен, што е значително помалку од 53-те на Леклер, и се чини дека е сè повеќе фрустриран по тркачките викенди. Особено тежок момент беше забележан на трката во Џеда, каде што Хамилтон призна дека не гледа решение за своите проблеми.
Многумина дебатираат во што би можел да биде проблемот, а сега поранешниот инженер на Ферари, Роб Смедли, понуди специфично техничко објаснување зошто Хамилтон не може да се вклопи со новиот болид.
- Болидот едноставно не е лесен за возење. Дефинитивно не одговара на стилот на Хамилтон. Шарл може да се справи малку подобро во квалификациите, но клучот е стабилноста на задниот дел, истакна Смедли во еден поткаст на Ф1.
Според него, за Хамилтон отсекогаш било важно да има сигурен заден дел од болидот, особено при влегување во брзи кривини.
- Ако автомобилот е „непослушен“ одзади, Луис не е среќен и не може да го извлече максимумот од него. Тоа е неговиот стил на возење, објасни Смедли.
Смедли истакнува дека Ферари во моментов е далеку од врвот и треба да пронајде две до три десетинки по круг за да се бори со конкуренцијата. Токму во овие маргини, тврди тој, лежи клучот за враќањето на Ферари на врвот.
