Стил и гламур на црвениот тепих во Венеција; Холивудските ѕвезди во блескаво издание на реномираниот фестивал

Холивудските ѕвезди и годинава на 82. издание на Венецискиот филмски фестивал блеснаа на црвениот тепих во разни бои, со стил и гламур, некои во посмели изданија, други во класика.

Пред блицовите на фоторепортерите во своите фустани и тоалети, меѓу другите, досега се појавија Џорџ Клуни и неговата сопруга Амал, Наоми Вотс, Ема Стоун, Лора Дерн, Хајди Клум, Алиша Силверстон, Тилда Свинтон, Номи Рапас, а се очекуваат и многу други.

Венеција е местото каде овој период се спојуваат и филмот и модата, а Лидо се претвора во модна писта на која познатите модни дизајнерски куќи („Шанел“, „Армани“, „Луј Витон“, Валентино…) ги промовираат своите најнови дизајни и ги трасираат модите текови во наредниот период.

Меѓу холивудските ѕвезди што се прошетаа на црвениот тепих за отворањето на Венецискиот фестивал на 27 август, беше и 56-годишната Кејт Бланшет, која изгледаше елегантно со фустан без ракави од Армани Приве. Ако фустанот на Кејт ви изгледа познато, тоа е затоа што го носеше пред три години на доделувањето на наградите на Screen Actors Guild Awards во 2022. Ѕвездата е позната по рециклирањето на своите впечатливи парчиња облека, носејќи фустани на повеќе настани низ годините. Поради ова, Бланшет веќе ја нарекуваат кралица на одржливата мода бидејќи е една од ретките славни дами кои носат исто парче облека на црвен тепих повеќе од еднаш. Актерката секогаш инсистирала да облече нешто што веќе го има во гардероберот, а се залага да ја зголеми свесноста за непотребното купување облека која завршува на депонија.

Инаку, на фестивалот, кој ќе трае до 6 септември, во главната натпреварувачка програма, меѓу другите, ќе бидат прикажани и филмовите „Џеј Кели“ на Ноа Баумбах; „Волшебникот од Кремљ“ на Оливие Асајас; „Франкенштајн“ од Гилермо дел Торо, „Куќа од динамит“ од Кетрин Бигелоу, „Тивок пријател“ на Илдико Ењеди; „Бугонија“ од Јоргос Лантимос, „Татко, мајка, сестра, брат“ од Џим Џармуш…

Фото: EPA/EFE