„Старлинк“ има огромна база на податоци: Маск ја даде на користење на ВИ

„СпејсИкс“ ја ревидираше својата политика за приватност на „Старлинк“ за да дозволи користење на кориснички податоци за обука на вештачка интелигенција, промена што би можела дополнително да ги зајакне амбициите на Елон Маск во областа на вештачката интелигенција, објавува „Хина“.

Пред големата почетна јавна понуда на акции планирана подоцна оваа година, „СпејсИкс“ е во разговори за можно спојување со компанијата за вештачка интелигенција на Маск xAI.

„СпејсИкс“, веќе највредната приватна компанија во светот, би можела да достигне пазарна вредност од повеќе од 1 трилион долари по излегувањето на берзата.

Во меѓувреме, „Старлинк“, проектот на „СпејсИкс“ чија цел е обезбедување брз сателитски интернет низ целиот свет, ја ажурираше својата глобална политика за приватност на 15 јануари, според податоците од веб-страницата на компанијата.

Новата политика наведува дека, освен ако корисникот не се откаже, податоците од „Старлинк“ може да се користат „за обука на нашите модели за машинско учење или вештачка интелигенција“ и може да се споделат со даватели на услуги и „соработници од трети страни“, без понатамошно појаснување.

Претходната верзија на политиката за приватност, архивирана во ноември и прегледана од „Ројтерс“, не содржеше никаква одредба за користење на податоци за обука на вештачка интелигенција. „СпејсИкс“ не одговори на барањето на „Ројтерс“ за коментар.

„Старлинк“ собира огромни количини на кориснички податоци, вклучувајќи локација, информации за кредитна картичка, контакт информации и IP адреси на корисниците. Компанијата, исто така, собира таканаречени комуникациски податоци, кои вклучуваат аудио и визуелни информации, податоци од споделени датотеки и „заклучоци што можеме да ги извлечеме од други лични податоци што ги собираме“, според глобалната политика за приватност на „Старлинк“.

Сепак, не е наведено кои специфични податоци ќе се користат за обука на вештачка интелигенција. Овој потег предизвика загриженост кај застапниците за приватност и групите на потрошувачи, кои предупредуваат дека користењето на лични податоци за обука на системи за вештачка интелигенција може да го прошири надзорот и да отвори простор за злоупотреба.

„Секако ме загрижува, а би ме загрижувало и да бев корисник на „Старлинк“. Честопати постојат легитимни причини за користење на податоци, но тука нема јасни ограничувања за што ќе се користи сето тоа“, рече Анупам Чандер, професор по технолошко право на Универзитетот Џорџтаун.

Компанијата xAI на Маск, кој беше проценет на 230 милијарди долари по неодамнешната рунда на финансирање, моментално развива голем јазичен модел наречен Grok и ја управува социјалната мрежа „Икс“.

Потенцијалното спојување помеѓу „СпејсИкс“ и xAI би можело да го забрза воведувањето на услуги базирани на вештачка интелигенција во производите на „СпејсИкс“ и би му обезбедило на xAI огромни нови збирки податоци за обука на неговите модели, вклучително и комуникациски податоци.

„Старлинк“, мрежа од повеќе од 9.000 сателити во орбитата на Земјата, моментално обезбедува интернет конекција за повеќе од девет милиони корисници.