Стапува на сила забраната за користење на социјалните мрежи за малолетниците во Австралија

Забраната за социјалните медиуми за лица под 16 години стапи на сила на полноќ по локално време во Австралија. Платформите како што се Инстаграм, ТикТок и Јутјуб сега се обврзани да блокираат сметки на корисници под 16 години или да се соочат со казни до 33 милиони долари, објави Ројтерс.

Забраната, која беше пофалена од родителите и застапниците за заштита на децата, но критикувана од технолошките гиганти и застапниците за слобода на говорот, е првиот практичен обид за регулирање на пристапот на децата до дигиталните платформи и се очекува да послужи како модел за други земји кои разгледуваат слични мерки.

„Иако Австралија е првата што усвои вакви ограничувања, малку е веројатно дека ќе биде последна“, рече Тама Ливер, професорка по интернет студии на Универзитетот Куртин.

Владите од Данска до Малезија, како и некои американски држави, веќе разгледуваат слични потези, објави Ројтерс.

Забраната првично ги опфаќа 10-те најголеми платформи, вклучувајќи ги Јутјуб, Инстаграм и ТикТок, и ќе се прошири како што ќе се воведуваат нови производи и корисниците ќе се префрлаат на алтернативи.

Платформите ќе користат алгоритми, податоци за лична карта или поврзани банкарски информации за да ја проценат возраста на корисниците.

Иако платформите тврдат дека забраната ја ограничува слободата на говорот и го загрозува растот на идниот број на корисници, владата вели дека целта е да се заштитат децата и да се намалат штетните ефекти од дигиталните медиуми.

Пред да стапи на сила забраната, 86 проценти од децата на возраст од осум до 15 години користеле социјални медиуми.