ССМ пред Собранието побара измени на Законот за минимална плата

Денеска работниците имаат многу причини да протестираат, а малку да празнуваат. Денеска протестираме за плата, денеска одиме пред Собрание, Стопанска комора и Влада да кажеме дека бараме 500 евра минимална плата, дека бараме за 100 евра зголемување на сите останатите плати, да бараме почитување на колективните договори за зголемување на платите и дека бараме пристојна плата за секоја работа, истакна Слободан Трендафилов, претседател на ССМ.

Фото:П.Стојановски

-Денеска на оваа страна од барикадите сме ние кои бараме достоинствена плата за достоинствена работа, од другата страна на барикадите се тие кои уживаат привилегии. Луксузот ваш е трудот наш. Ве молам, макар и симболично, да им го завртите сите грбот како што им го вртам јас, за да почувствуваат како е кога работник ќе ви заврти грб. Им ветивме дека ќе дојдеме повеќе, ќе дојдеме и многу повеќе, доколку не донесат измени на Законот за минимална плата и не ги зголемат сите останати плати, доколку не – ние на минималец, тие на минималец, истакна Трендафилов, претходно повикувајќи ги присутните да му свртат грб на Собранието.

По Собранието учесниците се упатија кон Стопанската комора каде што им беше порачано на работодавците „да не се кријат“ затоа што работниците „им го заработуваат лебот, а за нив не останува ништо“ и дека и натаму синдикатот ќе биде „на браникот на работничките права“.

Меѓународниот ден на трудот е државен празник во над 80 земји во светот.  Се одбележува на 1 Мај во знак на почит кон жртвите на штрајкот што во 1886 година се одржал во Чикаго на кој се барало осумчасовно работно време.

Во 1889 година на основачкиот конгрес на Втората интернационала е донесена Декларација со која се повикуваат работниците од целиот свет на демонстрации со цел да се подобри нивната положба. Оттогаш во повеќето држави низ светот се одржуваат протестни маршеви.