Од утре во Србија стапуваат на сила ограничувањата на трговската маржа на 23 групи производи во малопродажба во маркетите. Тие вклучуваат млеко и млечни производи, јајца, безалкохолни пијалаци, кафе и чај, свежо и преработено овошје и зеленчук, мешунки, леб и печива. Маржите нема да смеат да бидат повисоки од 20 проценти.
Мерката замрзнати маржи ја примени македонската Влада уште во февруари годинава и траеше сè до 30 април. Кај нас, ограничувањето на маржите беше скалесто, односно на 5, 10 или 15 проценти и беа опфатени 102 групи прехранбени и непрехранбени производи. Во меѓувреме, беа најавени различни видови мерки и потрошувачки кошници, но се применува само училишната.
Од утре во Србија стапуваат на сила ограничувањата на трговската маржа на 23 групи производи во малопродажба во маркетите. Тие вклучуваат млеко и млечни производи, јајца, безалкохолни пијалаци, кафе и чај, свежо и преработено овошје и зеленчук, мешунки, леб и печива. Маржите нема да смеат да бидат повисоки од 20 проценти дури и за замрзнати производи, свежо и преработено месо и риба, како и за слатки. Шеќерот, медот, брашното, тестенините, маслата, оцетот, оризот се вклучени во регулативата, како и хартија и кујнски додатоци, козметика и производи за лична хигиена, храна за бебиња и пелени.
Оваа стапка мора да ја применуваат трговците кои во последната година оствариле деловен приход од повеќе од 4,5 милијарди динари, освен трговците кои работат во преносни продажни објекти. Доколку стапката на маржа за одредени производи била пониска од максималните 20 проценти, ќе се примени таа пониска стапка, односно – ако маржата била помала од 20 проценти, трговците нема да можат да ја зголемат на 20 проценти.
Маржата во големопродажбата исто така ќе биде ограничена. Маржата пресметана на продажната цена без ДДВ, минус рабати и попусти, исто така не смее да надмине 20 проценти. Ова ќе биде највисоката стапка на маржа за дистрибутерите, а и во овој случај, оние кои имале деловен приход од повеќе од 4,5 милијарди динари минатата година ќе мора да ја платат. Исто така, ако маржата досега била помала од 20 проценти, ќе се примени таа пониска стапка.
Трговците на мало и трговците на големо се должни да достават до Министерството за трговија електронски ценовници за стоки од 23 специфични групи производи, кои важат на 1 април, 1 август, 31 август и 1 септември 2025 година, најдоцна до 2 септември наутро.
Исто така, трговците се должни да достават важечки ценовници секој понеделник во текот на периодот на важење на оваа регулатива (шест месеци).
Одговорно лице во компанија кое го прекршува прописот може да биде казнето со 50.000 динари, како и да му биде забрането да извршува одредени работи во период од шест месеци до една година. Претприемачот ќе биде казнет и со забрана за одредени активности, но во тој случај казната ќе биде 150.000 динари.
Во Србија почнува да се применува оваа мерка за зауздување на цените, а кај нас уште во февруари годинава Владата ги ограничи маржите на повеќе од илјада производи и мерката траеше до 30 април. Кај нас, ограничувањето на маржите беше скалесто, односно на 5, 10 или 15 проценти и беа опфатени 102 групи прехранбени и непрехранбени производи. Така, со пет отсто маржа се продаваа основните осум прехранбени производи и тоа млеко, леб, брашно тип 400 и 500, јајца, масло за јадење, јогурт и кисело млеко или вкупно осум групи на производи. Ограничена маржа од 10 отсто имаше и на 55 прехранбени производи во кои спаѓаат месото и преработки од месо, шеќер, млечни производи, маргарин, путер, конзервиран зеленчук и овошје, грав, ориз и тестенини, алкохолни и безалкохолни производи, додека 15 отсто маржа имаше на 39 групи на прехранбени производи и средства за хигиена, свежо овошје и зеленчук, детергенти, бебешка храна, пелени, влошки, сапун и тоалетна хартија.
Ограничените маржи траеја до 30 април, по што трговците почна со ново покачување на цените. Летово Владата најави пет потрошувачки кошници – за самец, за млад брачен пар, за тричлено семејство, за четиричлено семејство и за пензионери.
– Мислам дека во иднина треба да опфатиме анализа на пет потрошувачки кошнички затоа што потребите на луѓето се според возраста, се разбира, но исто така и потребите на луѓето се во зависност од бројноста, како е сочинета една заедница – истакна тогаш премиерот Христијан Мицкоски.
Засега нема најава кога ќе бидат креирани овие пет кошници. Затоа, пак, до 15 септември е на важност училишната кошница која ги содржи сите неопходни производи (училишни чанти, прибори, тетратки, блокови, моливи, пенкала, гуми за бришење, фломастери, боици, острилки, линијари, шестари и хартија за фотокопирање) за учебната година по цени на нивото од 1 јуни, односно намалени од 10 до 15 отсто.
Родителите што имаат деца што одат на училиште велат дека намалувањето на цените на училишниот прибор им е олеснување за семејниот буџет, особено поради фактот што има многу други трошоци во септември, како подготовка на зимница, купување дрва за во зима…
Оваа мерката се спроведува втора година по ред и според заменик министерот за економија, Марјан Ристески со спроведувањето на оваа мерка, лани имаше заштеда од 750 до 2.000 денари од ученик, а годинава тој очекува заштедата да се движи од 800 до 2.000 денари од ученик.
(С. Бл.)
