„Спортот е место каде што ги поврзуваме нациите, испраќаме порака за мир“

Се одбројуваат последните минути пред почетокот на Зимските олимписки игри, а натпреварувачите се подготвени за најголемите дострели на најголемиот спортски настан.

Словенците бркаат неколку медали, пред сè во скијачки скокови, а на легендарната Тина Мазе, на конференцијата пред Зимските олимписки игри, ѝ беше поставено прашање поврзано со политиката.

На Зимските олимписки игри во Милано и во Кортина д`Ампецо, ќе се натпреваруваат седуммина натпреварувачи од Белорусија и од Русија под неутрално знаме, како и шестмина натпреварувачи од Русија. Еден полски новинар ја праша словенечката шампионка што мисли за тоа. Таа одговори на исклучително спортски и џентлменски начин.

• Мислам дека спортот е место каде што ги поврзуваме сите нации. Олимписките игри се место на поврзување, на добри вибрации. Спортот е здрав и конкуренцијата во спортот е здрава. Мислам дека ова е шанса да се поврзат нациите и да се испрати порака за мир – започна Тина Мазе, сега професионален консултант и коментатор за „Евроспорт“.

Словенечката скијачка нагласи дека спортот е начин на кој може да се натпреваруваат нациите, но во фер и спортски услови.

• Можеме да се натпреваруваме едни со други, но во спорт каде што борбата е фер. Тоа е она што треба да го претставуваат спортот и Олимписките игри. Здрав начин на натпреварување на нациите, би рекла. Мислам дека е убаво затоа што сите сме пријатели. Знаеме што е потребно да се биде добар натпреварувач, колку е потребно да се биде квалитетен натпреварувач, да се биде брз на скиите во алпско скијање. Тоа не треба да има никаква врска со политичките прашања – заклучи таа.