Перо Камиказа за здравствената состојба на познатиот музички новинар и радиоводител, Драган Б. Костиќ!
Гитаристот и фронтмен на легендарниот македонски рок-бенд „Меморија“, Петар Георгиевски попознат како Перо Камиказа, ја потресе јавноста со својата емотивна порака посветена на познатиот новинар и радиоводител, а воедно и автор на емисиите „Дискоселектор“ и „Заборави ако можеш“, исто така и автор на неколку други радиопроекти, како што се: „Радиоурнебе“, „Пријатели, добар ден!“, квизот „Јас ли сум на ред?“. Во текот на кариерата стана и страстен колекционер на над еден милион аудиозаписи.
Тоа е Драган Б. Костиќ, кој деновиве се соочува со сериозни здравствени проблеми. Георгиевски вели дека се гордее со тоа што растел покрај таков великан радиоводител и дека му е неизмерна радоста бидејќи повторно (за сега, преку телефон) го чувствува неговиот ведар, оптимистички дух. – Драган Б. Костиќ овие неколку месеци ја бие животната битка, да се биде или не. Сполај му на Бога, има волја за живот. Овие денови, се слушаме и сè подобро ми звучи. Мислата му е бистра и на секое прашање одговара концизно и точно. Јас и Драган Б. Костиќ имаме уште многу што да направиме и да раскажеме заедно. На маестрото му посакувам што побрзо целосно закрепнување и повторно беседење за сè и сешто. Сполај ти, Боже, што ни ги чуваш легендите!!!
Камиказа ја сподели и пораката што му ја испратил Костиќ во далечната 2018 година. Во неа, популарниот водител пишувал за пензијата како за некој нов почеток во својот живот, но пишувал и за вредностите на семејството. – Човек не се памети по бројот на годините, туку по она што ќе го остави зад себе. Токму затоа, ако можеш, оставај уште многу! Само напред и само туркај!
Да не се заборави дека во 2024 година, со музичкиот настан насловен „Последниот танц“, Драган Б. Костиќ славенички ја одбележа својата 50-годишна кариера како музички новинар и музички радиоводител. (Д. М.)
