Општина Кочани продава државно земјиште во близина на Градскиот базен и стадионот „Никола Мантов“, наменето за изградба на бањски, спа-комплекс. Објавен е јавен повик, а продажбата ќе се изврши по пат на јавно наддавање.
– Целта е да се искористат потенцијалите на геотермалната вода, чиј цевковод поминува во непосредна близина на парцелата која е со површина од 12 илјади квадратни метри. Комплексот треба да обезбеди физичка релаксација и закрепнување, со оглед што геотермалната вода и хидромасажата помагаат за опуштање на мускулите, побрзо закрепнување од спортски повреди и подобрување на циркулацијата на крвта. Треба да се искористат лековитите ефекти во лекување на нервни заболувања, дигестивни проблеми, гинеколошки состојби, егземи и дерматити. Посетата на спа-центарот ќе овозможи и намалување на стресот, подобрување на менталната благосостојба и целосна релаксација. Дополнително, може да се привлечат домашни и странски посетители, што ќе го зајакне туризмот во Кочани и ќе создаде нови работни места – истакна в.д. градоначалникот, Венко Крстевски.
Почетната цена на јавното наддавање изнесува 583 денари за квадратен метар, при што заинтересираните треба да достават гаранција во висина од над 14 илјади денари. Пријавувањето е до 23 јуни годинава.
Парцелата за спа комплексот е вцртана во Деталниот урбанистички план што Општина Кочани го донесе уште пред околу две децении, но досега немаше повик за продажба и објектот не се реализираше во практика.
