Создадена е коалиција против контроверзниот план на ЕУ за Украина

Италија ѝ се придружи на Белгија во спротивставувањето на планот на Европската Унија да користи замрзнати руски државни средства како колатерал за бескаматен заем за Украина, покажува интерен документ што го виде Политико.

Интервенцијата на Рим, третата најголема земја-членка во ЕУ по население и моќ на глас, доаѓа помалку од една недела пред клучниот состанок на лидерите на ЕУ во Брисел и сериозно ги поткопува надежите на Европската комисија за постигнување договор за планот.

Европската комисија сака земјите-членки да постигнат договор на самитот на Европскиот совет на 18 и 19 декември, така што милијарди евра руски девизни резерви, кои се чуваат во белгиската банка „Еуроклеар“, ќе можат да бидат ставени на располагање на Украина за да ѝ помогнат на нејзината економија разурната од војната.

Белгиската влада долго време се двоумеше поради стравот од плаќање висока цена во случај на арбитражна одлука во корист на Русија. Сепак, досега таа немаше силен сојузник.

Тоа сега се промени откако Италија, заедно со Белгија, Малта и Бугарија, изготвија документ со кој ја повикуваат Европската комисија да разгледа алтернативни начини за финансирање на Украина во наредните години, наместо да користи замрзнати руски средства.

Четирите земји рекоа дека „ги покануваат Комисијата и Советот да продолжат да истражуваат и дискутираат за алтернативни опции во согласност со правото на ЕУ и меѓународното право, со предвидливи параметри и значително пониски ризици, со цел да одговорат на финансиските потреби на Украина“.

Ова е таканаречениот план Б, кој би подразбирал заедничко задолжување од страна на Европската Унија со цел финансирање на Украина во наредните години.

Но, оваа идеја има и голем број проблеми. Критичарите предупредуваат дека тоа дополнително ќе го зголеми веќе високото ниво на јавен долг во Италија и Франција, а исто така бара едногласна одлука, што значи дека може да биде блокирана од унгарскиот премиер Виктор Орбан.

Иако овие четири земји, дури и со евентуална поддршка од Унгарија и Словачка, не би можеле да формираат блокирачко малцинство, нивните јавни критики ги ослабуваат шансите на Европската комисија да постигне политички договор уште следната недела.

Италијанската премиерка Џорџија Мелони постојано ги поддржува санкциите против Русија, но коалицијата што ја предводи е поделена околу поддршката за Украина. На пример, вицепремиерот Матео Салвини го поддржа планот на американскиот претседател Доналд Трамп за прекин на војната во Украина.