Предлог-законот за Советот на јавни обвинители е усвоен на вчерашната владина седница, по што ќе оди во собраниска процедура на усвојување. Министерството за правда, денеска, соопшти дека законското решение е значаен чекор кон зајакнување на независноста, отчетноста и на транспарентноста на јавнообвинителскиот систем.
Некои од клучните измени кои се предлагаат се засилена улога на Советот во постапката за избор и разрешување на државниот јавен обвинител, вклучително и можност за поднесување иницијатива за разрешување до Собранието, како и зајакната транспарентност на работата на Советот.
– Понатаму, се предложува детално уредена постапка за разрешување на претседателот и заменик-претседателот на Советот, која се поведува врз основа на образложено барање од најмалку четири члена на Советот, воведување прецизни и јасни критериуми за избор на членови на Советот, со кои се гарантира стручност, искуство и интегритет, по пример на новиот Закон за Судскиот совет, како и детално уредена постапка за разрешување на член на Советот, со прецизирани рокови и јасни критериуми – наведуваат од Министерството за правда.
На крајот на декември минатата година, Владата го усвои и предлог-законот за јавно обвинителство.
Пред да се најдат на владина седница, овие два закони беа позитивно оценети од Венецијанската комисија на Советот на Европа во мислењето, кое за двете предлог-законски решенија, во јули минатата година, го побара министерот за правда, Игор Филков.
