„Сотбис“ ги враќа светите будистички скапоцености во Индија по 127 години

Скапоцените камења од Пиправа, опишани од археолозите како едно од најневеројатните откритија на модерното време, требаше да завршат на аукција во Хонг Конг во мај, пишува Би-Би-Си. Таа продажба беше откажана по дипломатска интервенција и закана со тужба од Делхи, и на крајот завршија во рацете на конгломератот „Годреј индустрис груп“ со седиште во Мумбаи.

„Сотбис“ изјави дека е „задоволен што ги враќа скапоцените камења“ во Индија по два месеци преговори со сопственикот, новиот купувач и индиската влада. Скапоцените камења сега ќе бидат изложени во таа земја, додаде аукциската куќа.

Индискиот премиер Нарендра Моди го поздрави враќањето, нарекувајќи го „радосен ден за културното наследство на Индија“ и нагласувајќи дека тоа ќе го направи секој Индиец горд.

Моди во објава на X рече дека скапоцените камења се историски вредни и дека нивното враќање се вклопува во пошироката цел на Индија за враќање и зачувување на своето културно наследство.

Скапоцените камења биле пронајдени во 1898 година од англискиот агент за недвижности Вилијам Клакстон Пеп во Пиправа во северна Индија, недалеку од родното место на Буда, кое сега се наоѓа во Непал. Пронајдени се речиси 1.800 бисери, рубини, сафири и парчиња злато, заедно со делови од скелет кој, според натписите на пронајдената урна, му припаѓал на самиот основач на будизмот.

На Пеп подоцна му било дозволено да задржи повеќе од 300 дупликати скапоцени камења, кои останале во неговото семејство со децении. Овој накит со текот на времето бил во приватни колекции.