Сопственикот на Панатинаикос полуде: Сите да заминете!

Сопственикот на грчкиот кошаркарски гигант Панатинаикос, Димитрис Јанакопулос, го шокираше спортскиот свет откако им порача на сите во клубот дека е време да поднесат оставка. Сето ова се случи по шокантниот пораз на неговиот тим од Арис БК во Солун. Панатинаикос беше поразен со 102:95 по продолжението, на хаотичен натпревар од грчкото првенство.

Ситуацијата дополнително ескалираше во четвртата четвртина, кога беше исклучен тренерот на „зелените“, Ергин Атаман, а тимот беше предводен од клупата, од помошникот Христос Серелис, до крајот на натпреварот. Сепак, она што следуваше по натпреварот привлече уште поголемо внимание.

Разбеснетиот Јанакопулос се огласи на „Инстаграм“ за да ги нападне целиот тренерски персонал и играчите на Панатинаикос, велејќи им дека сите треба колективно да поднесат оставка по враќањето во Атина.

– Тренери, помошници, сите вие, немате поим каде играте! Ова е Панатинаикос! Се надевам дека ако воопшто имате достоинство да се вратите во Атина, сите ќе поднесете оставка! И играчите, исто така! – рече разбеснетиот сопственик на клубот.

Потоа следуваше уште пожестока порака, во која не поштеди никого во соблекувалната.

• Играчи, тренери, асистенти – вие сте срам! Кога ќе се вратите во Атина, сите треба да си заминете! Срам да ви е! – додаде Јанакопулос.

Тој особено нагласи дека не сака да слуша никакви изговори по овој пораз.

• Не сакам ништо да слушам, ниту за судиите ниту за криминалните организации –за ништо. Не може да имате буџет од 40 милиони евра и да загубите од Арис. Доста е веќе! Почнете да играте кошарка и разберете каде сте! – порача Јанакопулос.

Со овој пораз, Панатинаикос го претрпи вториот неуспех во домашното првенство оваа сезона. Сепак, тоа беше доволно за да заостане зад Олимпијакос, кој во моментов е единствениот непоразен тим во лигата.

Реакцијата на сопственикот јасно покажува колку се големи очекувањата во Панатинаикос, особено имајќи ги предвид огромниот буџет и амбициите на клубот во Грција и во Евролигата.

Останува да се види дали овој јавен испад на Јанакопулос ќе го разбуди тимот или дополнително ќе ја продлабочи кризата во неговите редови.