Сопственикот на клуб на смртта во Кран-Монтана призна: Излезот за итни случаи бил заклучен

Се шпекулираше веќе некое време, но сега информацијата е потврдена – вратата за итен излез во клубот „Ле Констелашн“ во скијачкиот центар Кран-Монтана, каде што загинаа 40 лица на новогодишната ноќ, била заклучена.

Сопственикот на клубот го признал ова на истражителите, тврдејќи дека ја отклучил кога пристигнал на местото на настанот по пожарот.

Зборовите на некои сведоци и вработени во швајцарскиот клуб ги потврдил и сопственикот на клубот, Жак Морети, за време на неговото испрашување пред истражителите.

Според информациите дадени од РТС (швајцарска радио и телевизиска станица), тој им рекол дека вратата за итен излез била заклучена одвнатре во ноќта на трагедијата. Кога пристигнал на местото на настанот по пожарот, ја отклучил вратата однадвор и видел неколку тела внатре.

Морети, кој е во притвор од петокот поради сомнение за бегство, рече дека не знае зошто излезот бил блокиран. Истрагата, предводена од четворица обвинители, ќе мора да ја утврди вистината.

Швајцарските медиуми истакнуваат едно нешто – овој елемент ќе биде клучен за истрагата, а причината е едноставна: неколку посетители се обиделе да избегаат низ излезот за итни случаи кога избувнал пожарот, но биле заробени и затоа осудени на смрт.

Доколку обвинителите веруваат дека Жак и неговата сопруга Џесика Морети, која е во домашен притвор, се делумно одговорни за заклучената врата, тие би можеле да ги преквалификуваат кривичните дела за кои се обвинети.

Во моментов, обвинетите мора да се изјаснат за виновни за убиство од небрежност, подметнување пожар и нанесување тешки телесни повреди.

Меѓутоа, ако се покаже дека осомничените знаеле дека вратата е заклучена, ова би можело да ја покрене хипотезата за убиство со умисла.

Во тој случај, тие би можеле да се соочат со затворска казна до 20 години. РТС објавува уште една клучна информација во врска со пената на таванот.

Жак Морети наводно им кажал на истражителите дека неодамна самиот ја отстранил старата акустична пена од таванот и ја заменил со пена купена од продавницата „Хорнбах DIY“.

Акустичната пена е лесно запалив материјал кој може да го забрза ширењето на пламенот и токсичните испарувања, правејќи го воздухот невозможен за дишење за неколку минути.

Во пожарот загинаа 40 лица, многу од нив малолетници, а 116 беа повредени. Покрај 21 швајцарски државјанин, меѓу загинатите имало и неколку странци, меѓу кои седум Французи и шест Италијанци, од кои најмладиот имал 14 години. Меѓу загинатите е шеснаесетгодишниот Стивен Ивановски, по потекло од делчевскиот регион. Повредените се лекуваат во неколку европски земји.

Причината за пожарот сè уште не е официјално позната, но првичните наоди укажуваат дека најверојатно е предизвикан од искри од прскалки монтирани на шишиња шампањ. Искрите ја запалиле изолационата пена на таванот, а потоа пожарот се проширил многу брзо.

Јавниот обвинител на швајцарскиот кантон Вале нареди притвор на Жак Морети по сослушувањето во петокот, додека неговата сопруга и ко-сопственичка на барот, Џесика, останува на слобода.

Двајцата изразија жалење за трагедијата. Таа е обвинета и дека се обидела да избега од клубот со пари во средината на пожарот, наместо да им помага на другите, пренесува Телеграф.