Сопствениците на швајцарски бар каде што избувна катастрофален пожар на новогодишната ноќ, при што загинаа 40 лица, ги обвинија своите вработени за трагедијата, особено младата келнерка Циане Панин (24), која исто така загина во пожарот.
Жак Морети (49) и неговата сопруга Џесика Морети (40) се под судски надзор откако избувна пожар во хотелот „Констелејшн“ во ски-центарот Кран-Монтана на 1 јануари. Обвинителите интензивно работата со двајцата осомничени француски државјани, а според транскриптите од испрашувањето добиени од „Ле Паризиен“, нивната одбрана се базира на тврдењето дека тие не се одговорни за трагедијата, туку други, објавува „Дејли меил“.
За време на речиси 20-часовното испрашување, семејството Морети тврдеше дека во судбоносната ноќ, Циане Панин приредувала претстава, качувајќи се на рамената на нејзиниот колега и мавтала со шишиња шампањ со запалени прскалки. Тие велат дека таа не забележала како прскалките удираат во таванот на подрумот на барот, кој бил покриен со запалива пена, а има и видео снимки од тоа.
„Тоа беше шоуто на Циана. Јас не ја спречив да го прави тоа“, им рече Жак Морети на обвинителите. „Не ја видовме опасноста. Циана обожаваше да го прави тоа, обожаваше да биде дел од шоуто.“
„Циана го направи тоа по своја слободна волја. Да мислев дека има барем најмал ризик, ќе го запрев. За десет години водење на бизнисот, никогаш не помислив дека може да има каква било опасност“, рече неговата сопруга, Џесика Морети.
Сепак, семејството на починатата келнерка и преживеаните сведоци остро ги оспоруваат овие тврдења. Тие велат дека Џесика Морети, која беше менаџер таа вечер, ја испратила Циана со шишињата и ја охрабрила да го изведе трикот, користејќи промотивна кацига од познатиот бренд за шампањ Дом Перињон.
„Немаше обука, но на вработените им беше кажано што да прават во случај на пожар кога беа водени низ просториите. Евакуирајте ги клиентите, кренете аларм и јавете се во противпожарната служба. И секако, ако имаат време, користете ги противпожарните апарати“, рече Жак Морети, зборувајќи за противпожарната безбедност.
Кога се соочил со изјавата на вработен кој не знаел каде се противпожарните апарати, тој одговорил: „Можеби заборавив да ги дадам овие информации. Можеби заборавив.“
Двојката, исто така, се обидела да ја префрли вината на неименуван вработен, тврдејќи дека ја заклучил вратата за бегство во подрумот. Циана Панин бил пронајдена мртва веднаш зад таа врата, а причината за смртта била вдишување чад. Вратата подоцна била насилно отворена.
„Вратата секогаш беше отворена“, рекла Џесика Морети. „Нема ден што поминува, а да не се прашувам зошто таа врата била затворена таа ноќ.“
„По трагедијата дознавме дека еден вработен донел коцки мраз и, не разбирајќи зошто, ја затворил вратата“, рекол Жак Морети. Осомничениот вработен жестоко го негирал ова, наведувајќи: „Не затворив врата што веќе била заклучена“.
Во врска со запаливата пена инсталирана за време на реновирањето во 2015 година, Жак Морети изјавил: „Противпожарниот службеник и капетанот на противпожарната служба го одобрија тоа.“
Во јавноста се појави и видео каде, наводно, Џесика Морети се гледа како бега со касата во рака за време на пожарот. При вкрстеното испрашување, таа рече: „Го прифаќам она што се зборува за нас, дури и ако е лажно. Тоа не е ништо во споредба со она низ што минуваат семејствата“.
Кога беше прашана за малолетниците во клубот, меѓу кои беше и 14-годишникот кој почина, таа рече: „Ние не сме непогрешливи. Можеби имало лажни лични карти. Можеби некои се протнале“.
Морети се гонат за убиство од небрежност, телесна повреда од небрежност и палење од небрежност за смртта на 40 лица и тешки повреди на 116 лица. Нивните пасоши се конфискувани, тие носат електронски нараквици и се должни да се јавуваат во полиција на секои три дена, додека целосно ја негираат својата кривична и граѓанска одговорност.
