Сообраќајот на сите патнички возови во Србија е привремено прекинат додека не се извршат проверки поради пријава дека на сите возови и пруги се поставени експлозивни направи, соопштија од „Србијавоз“, објави „Данас“.
„Србијавоз а.д. ги информира корисниците на услугите дека на 27 јуни 2025 година, во 10:18 часот, е примен повик со анонимна пријава дека на сите возови и пруги се поставени експлозивни направи“, соопшти компанијата.
Како што објаснуваат, сообраќајот на сите патнички возови е привремено прекинат додека надлежните државни органи не ги извршат потребните проверки.
„Ги молиме патниците да ги следат информациите преку веб-страницата www.srbijavoz.rs. Им благодариме на патниците за нивното разбирање“, рекоа тие.
Инаку, на 14 март оваа година, оваа компанија објави известување за патниците дека меѓуградскиот превоз е привремено прекинат.
Како што беше наведено во соопштение објавено во 2:50 часот, причината за прекинот е пријава за експлозивни направи.
