Тоа се, впрочем, насловите на победничките песни од двете спектакуларни фестивалски вечери (фолк и интернационална): „Соња“ со Мишко Крстевски и „Ти миришеш на љубав“ со Ангело, претставникот на Словенија
Дуле МИЌИЌ
Не за џабе толку многу врева околу охридскиот фестивал, бидејќи имаше многу добри песни, потенцијални хитови и од фолк и од интернационалната (забавна) вечер. Сосе победниците: нашиот Мишко Крстевски и Словенецот Ангело (кој има македонско потекло).
Особено би ја пофалиле песната „Ти још миришеш на љубав“, прекрасна балада со певлив рефрен која при самото прво слушање влегува во ушите. За самото пеење на оваа песна на Ангело, ич да не правиме муабет. Вонсериско! Автор на победничката песна е Горан Шарац. Композиторот е од Љубљана, но тој често гостува на македонски фестивали.
Како и во интернационалната, така и во фолк-вечерта добивме хитовска победничка песна. Со насловот „Соња“, а ја испеа Мишко Крстевски токму онака срцето да ни го растопи! А и сценскиот имиџ му беше многу интересен. Типски, фраерски!
Иако на фестивалот не настапи толку најавуваниот, познатиот Оливер Мандиќ (наводно го пропуштил авионот од Белград), сите и без него уживавме во фантастичниот настап на популарниот овогодишен евровизиски учесник „Принц од Врање“. Долгокосиот рокер ги шармираше сите токму со евровизискиот хит „Мила“.
Новинарите, исто така, беа испочитувани, (сосе весникот ВЕЧЕР и порталот vecer.press), па така и ние си ги доделивме наградите. Во фолк-вечерта, новинарската награда му припадна на кумановскиот боем Нино Величковски, а во интернационалната, на музичкиот шмекер Блаж Маротов. Тој имаше интересна песна, а на сцената беше придружуван од текстописецот Огнен Неделковски.
И, ете, тоа би било речиси сè. Онака накусо. Бидејќи за овој галафестивал налик на славниот „Сплитски“ (најдобар во бившата Југославија), кој изроди куп балкански хитови, може да се пишува до „утре сабајле“.
Секако, и за оние пејачки ѕвезди кои за овие три децении зедоа учество на сцената на балканскиот Ерусалим: Неда Украден, Владо Калембер, „Нови фосили“, Горан Каран, Гоца Тржан, Мики Јевремовиќ, „Мирзино јато“, Зорица Конџа, Тоше Проески, Калиопи… како и рокерот Дадо Топиќ. Тој и ова лето заедно со публиката (иако замрзната поради наглата промена на времето), ја пееше маестрално на охридскиот фестивал вечната „Тамо гдје вјечно сунце сија, тамо је Македонија, народ и земља коју волим ја”!!!
