Собранието на Република Српска изгласа референдум за пресудата против Додик – ќе се одржи на 25 октомври

Народното собрание на Република Српска ги усвои заклучоците на парламентарното мнозинство, според кои Парламентот ја отфрла можноста за одржување предвремени избори за претседател на Република Српска и бара сите политички фактори во Република Српска, политички партии и поединци да не се регистрираат за евентуални предвремени избори за претседател на Републиката, пренесува Независне.ме.

50 пратеници гласаа за заклучоците, никој не беше против или воздржан.

Според овие заклучоци, Парламентот бара сите власти на Република Српска и единиците на локалната самоуправа да не преземаат никакви дејствија поврзани со евентуалното одржување предвремени избори за претседател на Републиката, објавува „РТРС“.

Се нагласува дека Народното собрание „не ја прифаќа и отфрла пресудата на неуставниот Суд на БиХ изречена против претседателот на Република Српска, како и одлуката на Централната изборна комисија на БиХ за престанок на мандатот на претседателот на Република Српска, Милорад Додик“.

Собранието, исто така, го усвои Законот за измени на Законот за референдум и граѓанска иницијатива, по итна постапка, со 50 гласа „за“, никој не се изјасни против или воздржан.

Народното собрание, исто така, усвои одлука за распишување референдум за одлуките на Судот на БиХ издадени против претседателот на Република Српска и одлуката на Централната изборна комисија на БиХ за престанок на мандатот на претседателот на Републиката Милорад Додик.

Референдумското прашање гласи – „Дали ги прифаќате одлуките на неизбраниот странец Кристијан Шмит и пресудите на неуставниот Суд на БиХ издадени против претседателот на Република Српска, како и одлуката на ЦИК за одземање на мандатот на претседателот на Република Српска Милорад Додик“.

Датумот на референдумот е 25 октомври.

50 пратеници гласаа за одлуката, немаше гласови против или воздржани.