Собранието го изгласа Законот за прекршоци – „Безбеден град“ почнува од 1 февруари

Координаторката на пратеничката група на Европскиот фронт, Рина Ајдари, ги соопшти причините зошто гласале против. Според неа, забелешките поврзани со употребата на албанскиот јазик, примената само во три градови и неусогласеноста на сообраќајната сигнализација, не се вклучени во законот.

„Ние како пратеничка група донесовме одлука земајќи го предвид и притисокот од граѓаните, имајќи предвид дека законот е неуставен, поради самиот факт што се имплементира само во еден дел од Република Северна Македонија, како и сите забелешки што ги изнесовме на прес-конференција. Донесовме одлука да не го поддржиме Законот за прекршоци, со кој ќе се финализира таканаречениот проект „Безбеден град“, бидејќи остава многу простор за подобрување и затоа што сите оние гаранции што практично ги добивме од координаторот на ВМРО-ДПМНЕ и од претставниците на МВР нема да бидат имплементирани во законот. Ситуацијата беше нејасна и како резултат на тоа решивме да не го поддржиме.“, порача Рина Ајдари.

И пратеникот од СДСМ, Оливер Спасовски, се изјасни против овој закон, бидејќи според него, остава многу простор за злоупотреби.

„Ќе гласаме против, бидејќи погрешно ѝ се претставува на јавноста дека станува збор за закон за ‘Безбеден град’. Ова не е закон за ‘Безбеден град’, туку за казните што ќе ги генерира ‘Safe City’. Во врска со ова прашање, сакам да истакнам дека две работи се клучни, за кои досега сме укажувале во јавноста. Сè што ќе се зема како доказ од безбедносните камери е нејасно за јавноста како ќе се чува и како може да биде злоупотребено.“, вели Оливер Спасовски.

За пратеничката Илире Даути, законот не е правичен за сите и е спротивен на член 9 од Уставот.

„Имате огромна одговорност пред самите себе, бидејќи денес ризикувате, преку гласање на закони кои опфаќаат само три града, а не целата територија на државата, директно да станете соучесници на Владата во кршењето на Уставот на Република Северна Македонија, конкретно член 9. Никој не е против безбедноста на граѓаните, почнувајќи од безбедноста во сообраќајот и секој друг вид безбедност, но апсолутно сме против правење поделби токму во овој чувствителен сегмент како што е безбедноста, оставајќи ги небезбедни и другите градови“, вели Илире Даути.

Од Алијансата за Албанците на Арбен Таравари оценија дека актуелната примена на овој проект отвора сериозни правни, социјални и уставни прашања.

„Јавно го искажавме нашиот став дека сме за безбедноста на граѓаните, но не сме за овој закон да помине во ваква форма, бидејќи не е сеопфатен и не е во согласност со Уставот на Република Северна Македонија, односно со член 9 од Уставот, бидејќи законот предвидува да функционира само во три града, со што се дискриминираат граѓаните.“, вели Ријад Шакири.

Законот, кој ќе стапи во сила од 1 февруари, предвидува зајакнување на безбедноста во сообраќајот преку воведување посебна постапка за прекршоци утврдени со помош на технички средства и уреди за снимање. Брзото и ефикасно санкционирање на прекршителите, како и изрекувањето казнени мерки, се очекува да влијае на општата превенција во областа на сообраќајната безбедност. Во првата фаза, системот „Безбеден град“ ќе регистрира прекршоци како: пречекорување на дозволената брзина, поминување на црвено светло, истек на важноста на сообраќајната дозвола и непрописно паркирање. Во втората фаза се предвидува проширување на спектарот на прекршоци. Во моментов, камерите на „Безбеден град“ се во функција само во Скопје, Тетово, Куманово и Коридорот 8, а во текот на годината се очекува системот да се прошири на целата територија на државата.