Со умереност до подолг и здрав живот: Познат онколог откри „што треба да намалите за 30 проценти, за да живеете 20 проценти подолго“

Силвио Гаратини, 97-годишен онколог, верува дека намалувањето на внесот на храна може да биде клучот за долг и здрав живот.

Гаратини истакна дека здравите навики во начинот на живот им користат не само на поединецот, туку и на семејството и здравствениот систем, бидејќи многу хронични болести се директно поврзани со неправилна исхрана и седечки начин на живот, пишува „Дејли Експрес“.

„Ако јадете 30 проценти помалку, можете да живеете 20 проценти подолго“, вели тој, нагласувајќи дека ограничувањето на калориите е еден од најважните фактори за долговечноста.

Зборувајќи за исхраната, Гаратини се залага за избалансирано мени без претерување, со разновидна храна што ги обезбедува сите потребни хранливи материи.

„Разновидноста значи да јадеме по малку од сè за да ги добиеме и микро и макронутриентите што ни се потребни“, објаснува Гаратини.

Тој нагласува дека умереноста е подеднакво важна како и квалитетот на храната што ја јадеме.

Иако трендовите како што е интермитентниот пост се популарни денес, Гаратини верува дека не е важно кога јадеме, туку колку јадеме вкупно во текот на денот.

„Некои студии не покажаа значајна разлика помеѓу оние кои јаделе без временски ограничувања и оние кои имале пауза од 10 до 12 часа помеѓу оброците. Најважно е да јадете малку“, вели почитуваниот онколог.

Според него, без оглед на тоа дали имате три или пет оброци на ден, клучот за долговечноста лежи во умереноста и квалитетот на хранливите материи, а не во точниот распоред на оброците.