Oпштина Центар почна со поставување 30 дигитални уреди за мерење на бучавата на најфреквентните локации во градот, со цел континуирано следење на нивото на звук и обезбедување податоци за брзо и ефективно постапување.
Според градоначалникот Горан Герасимовски, 19 од овие уреди веќе се инсталирани.
– Овие сензори континуирано ќе ја следат бучавата и ќе алармираат секогаш кога ќе биде над дозволеното ниво. Со ова прецизно ги мапираме најгорливите точки, а истовремено им обезбедуваме материјал на нашите инспекциски служби за постапување – истакна Герасимовски.
Досега се поставени уреди во Дебар Маало, на улиците „Орце Николов“, „Мирослав Крлежа“ и „Отон Жупанчиќ“, како и на „Боемска 1“ и на „Боемска 2“. Во следните месеци, системот ќе се прошири со дополнителни уреди на улицата „Ленинова“, во населбите Капиштец и Буњаковец, на кејот 13 Ноември, кај Старата железничка станица и на Кале.
– Целта е да се покријат сите критични зони погодени од прекумерна бучава и да се обезбеди подобар квалитет на живеење за граѓаните –велат од Општина Центар.
Проектот е прва фаза од пошироката стратегија на Општина Центар за континуирано следење и намалување на бучавата, со користење современ софтвер, кој овозможува точно мерење во реално време. Општината најавува дека јавноста ќе биде редовно информирана за следните активности и дека ќе се воведуваат современи решенија за трајно справување со овој урбан проблем.
