Слатките никогаш не биле поскапи: Доаѓа „велигденска инфлација“

Екстремните временски услови во Западна Африка ги зголемуваат цените на какаото, предизвикувајќи „велигденска инфлација“ во Европа и Велика Британија.

Цените на слатките брзо растат поради падот на производството на какао во Западна Африка. Климатските промени предизвикани од човекот доведоа до екстремни временски настани во регионот, предизвикувајќи нагло намалување на производството на какао и драстично зголемување на цената на чоколадото. Експертите го нарекоа новиот феномен „велигденска инфлација“ или Easter Eggflation.

Според анализата на Одделот за енергетска и климатска интелигенција (ECIU), просечната цена на популарните велигденски чоколади во Велика Британија се зголемила за две третини за само три години, додека некои јајца се зголемиле повеќе од двојно. Податоците за следење на просечните цени на големите брендови во британските супермаркети помеѓу јануари и март покажуваат дека велигденските јајца „Galaxy “ забележале најголемо зголемување на цените – дури 105 проценти на 100 грама од 2023 година. „Cadbury Creme Eggs“ поскапеле за 81 процент, додека „Lindt Gold Bunny“ од 200 грама сега е поскапо за 77 проценти, на 8,42 фунти (околу 9,72 евра).

Во 2025 година, цените на чоколадото во ЕУ пораснале во просек за 18 проценти, најмногу од кој било прехранбен производ, додека вкупните потрошувачки цени во ЕУ пораснале за околу 2,5 проценти годишно.

Експертите го наведуваат драматичниот пораст на цената на какаото, кој е под влијание на глобалното затоплување, како главна причина за зголемувањето на цените. Поголемиот дел од какаото (околу 60 проценти) доаѓа од Западна Африка, од влажни земји како што се Брегот на Слоновата Коска и Гана, каде што топлите, влажни сезони се менуваат со кратки суви периоди.

Зголемените температури доведоа до екстремни временски настани што го намалија производството на какао за до 40 проценти во последните три години. Екстремните врнежи од дожд во 2023 година предизвикаа болест на црните мешунки што уништи голем дел од жетвата какао. Сушата на почетокот на 2024 година и екстремната топлина дополнително го влошија садењето, растот и бербата на какаото.

Некои експерти предупредуваат дека светот би можел да остане без какао до 2050 година ако емисиите на гасови што ја задржуваат топлината продолжат да растат.

„Велигденската инфлација“ испраќа силна порака за тоа што нè очекува ако светот не ги намали емисиите и не обезбеди стабилни синџири на снабдување.