Скриениот бисер на Медитеранот без масовен туризам: Ручекот чини три евра, а кафето 30 центи

Во време кога популарните дестинации се преполни со туристи, Алжир полека излегува од сенката и станува вистински бисер за патниците кои бараат автентично искуство, природна убавина и прифатливи цени. Оваа северноафриканска земја сè уште не ги освоила масите туристи, па патниците можат да уживаат во мирот и автентичната локална атмосфера.

Алжир е идеален за патници кои сакаат да уживаат максимално со минимален буџет.

Сместување: Буџетските хотели и хостели чинат помеѓу 20-60 евра по ноќ, додека луксузниот смештај може да биде помеѓу 100-150 евра.

Храна: Автентичен оброк во локален ресторан чини околу 5-10 евра, додека уличната храна може да се најде за само 1-2 евра.

Транспорт: Возење со такси од 10-15 километри чини само неколку евра, додека повеќето градски автобуси чинат под 1 евро.

Атракции: Влезот во многу историски места е бесплатен или многу евтин. Во однос на содржината и односот вредност-квалитет, Алжир може да се спореди со Југоисточна Азија или Иран.

Градови и историја без гужва

Оран, честопати нарекуван „Париз во Африка“, нуди мешавина од француска и медитеранска архитектура, шармантни улици и импресивни катедрали. Посебно е атрактивна тврдината Санта Круз, до која може да се стигне со жичарница за помалку од едно евро, со панорамски поглед на градот и брегот.

Главниот град на Алжир нуди автентично искуство со знаменитости како што се палатата Гранде Посте, Палатата на културата и историската Касба, заедно со прекрасни џамии и колонијални згради.

За љубителите на археологијата, тука се античките градови Тимгад и Џемила, ретки римски руини кои се речиси без туристи.

Природата и пустината Сахара

Алжир, исто така, нуди неверојатна природна убавина. Можете да ја истражите Сахара со локални водичи и да го доживеете пустинскиот пејзаж, традиционалните села и оазите. Популарни дестинации вклучуваат Таманрасет и Тасили н’Аџер, каде што посетителите можат да видат антички карпести формации и да уживаат во недопрената природа.

Култура и фестивали

Посебно искуство е фестивалот Себеиба, стар повеќе од 3.000 години, каде што Туарезите изведуваат традиционални танци и ритуали. Ваквите автентични настани даваат единствена можност да се доживее локалната култура без масовен туризам.