Скопје со тетовираниот Божо Вреќо во магијата на босанска севдалинка

Наскоро во Македонската филхармонија! Познатиот, но и контроверзниот босански пејач, Божо Вреќо, за кого велат дека е крал на модерната босанска севдалинка, ќе има свој концерт во Скопје, на 21 ноември во Македонската филхармонија. Чуден е со својата физичка појава, поради долгите женски фустани во кои е облечен на сцената, со потпетици и со женските фризури, а со густа брада како маж.

Вреќо подготвува гламурозно музичко доживување за сите љубители на севдалинките. Престижниот „Њујорк тајмс“ за него напиша дека е „човекот со ангелски глас“. На скопјани и на публиката од цела Македонија кои не пропуштаат да го слушаат, им ветува двочасовна музика исполнета со емоции. Неговите концерти секогаш ветуваат голема и незаборавна народна забава.

Вреќо, во Скопје премиерно настапи во 2020 година, во Македонската опера и балет, каде што ја освои публиката. На концертот во Филхармонија, Божо ќе  пее за љубовта, за копнежот и разделбата, ќе зборува за тагата, меланхолијата и за осаменоста – емоции кои преку неговиот глас добиваат магична форма. Освен со неговите познати изведби на традиционалните севдалинки, Божо Вреќо изненадува и со нови композиции и текстови, создадени во соработка со врвни светски музичари.  (Д. М.)