Скандали се нижат: Челниците на „Би-би-си“ си поднесоа оставки за монтираниот говор на Трамп

Генералниот директор на „Би-би-си“, Тим Дејви, поднесе оставка, а набргу потоа и извршната директорка на вестите, „Би-би-си њуз“, Дебора Тернес. Оставките доаѓаат по критиките дека во документарната програма „Панорама“ бил монтиран говорот на Доналд Трамп и со тоа гледачите биле доведени во заблуда.

Во документарецот „Трамп: Втора шанса?“, кој се емитуваше една недела пред минатогодишните избори во САД, се монтирани видеа од говорот на Трамп од 6 јануари 2021 година, за да изгледа како да им кажал на своите поддржувачи дека ќе оди со нив до американскиот Капитол за да „се бори силно“, по што следуваа немири и напади пред Капитол и упад во зградата на Конгресот. Во својот говор во Вашингтон на 6 јануари 2021 година, Трамп рече: „Ќе одиме во Капитол и ќе ги бодриме нашите храбри сенатори, конгресмени и конгресменки“. Во документарецот, тоа гласеше: „Ќе одиме во Капитол и јас ќе бидам таму со вас. И ќе се бориме, ќе се бориме пеколно“. Двата дела од говорот што беа споени во една реченица во оригиналниот говор на Трамп беа со повеќе од 50 минути разлика. Коментарот „ќе се бориме како пекол“ е земен од сегмент во кој Трамп зборуваше за тоа колку биле „корумпирани“ американските избори и не се осврна на тоа што се случувало во Капитол во тоа време. Како што објави „Телеграф“, програмата „Панорама“ ги уредила двата дела од говорот на американскиот претседател, за да изгледа дека тој експлицитно ги охрабрувал немирите на Капитол Хил во јануари 2021 година.

Директорот Дејви, кој е на функцијата пет години и има 20-годишна кариера во „Би-би-си“, се соочуваше со зголемен притисок поради низа контроверзии и обвинувања за пристрасност што го прогонуваа јавниот радиодифузен сервис. Политичките лидери во Велика Британија изразија надеж дека оставките ќе доведат до промени, додека Трамп ја поздрави одлуката. Досега не се случило и генералниот директор и раководителот на „Би-би-си њуз“ да поднесат оставки во ист ден.

– Генерално, „Би-би-си“ работи добро, но имаше некои грешки и како генерален директор морам да ја преземам крајната одговорност, се вели во пораката на Дејви.

Дебора Тернес, која е извршен директор на вести и на актуелни настани, во последните три години им кажа на вработените дека „тековната контроверзност“ околу емисијата „Панорама“ „достигна фаза што ѝ штети на ’Би-би-си’ – институција што ја сакам“.

Ова не е прв скандал со објави на британскиот радиодифузен јавен сервис. Претходно беше обвинет за немање политичка неутралност во известувањето за војната меѓу Израел и Хамас, а имаше скандал и околу известувањето за музичкиот фестивал во Гластонбери, кога изведувач повикал на смрт на израелската војска. „Би-би-си“, исто така, се извинуваше за навредливо однесување кон учесници во една емисија. Исто така, „Би-би-си“ е поврзан со скандал со познати водители за кои има обвинувања за злоупотребување деца, за малтретирање и за сексуални напади. Минатата година, „Би-би-си“ беше потресен од нови обвинувања околу озлогласениот ТВ-водител, Хју Едвардс. На суд тој се изјасни за виновен за правење непристојни слики од деца, откако почнаа да циркулираат извештаи дека водител на „Би-би-си“, за кој подоцна се потврди дека е Едвардс, платил за сексуално експлицитни фотографии од млада личност. Во низата критики е и таа за пропусти во справување со обвинувањата за злоупотреби и мизогинија на поранешниот диџеј Тим Вествуд, кој во меѓувреме беше обвинет за четири силувања. Во извештајот е наведено дека „Би-би-си“ имал „значајни докази“ за неговото однесување, но не реагирал навреме.