Полуфиналните пресметки на Светското првенство се вистинско уживање за сите љубители на фудбалот, но натпреварот меѓу Аргентина и Англија убедливо го привлекува најголемото внимание кај навивачите. Огромниот интерес предизвика вистинска експлозија на цените на билетите, кои достигнаа рекордни износи.
Според податоците на TicketData.com, најевтиниот билет за дуелот во Атланта, кој се игра денеска, моментално чини 2.841 долар. Само во последните три дена цената порасна за 34 проценти, а во еден момент достигна и 2.966 долари.
Во споредба со овој натпревар, билетите за синоќешниот дуел меѓу Франција и Шпанија, кој се одигра во Далас, беа значително поевтини. Тие чинеа по 1.325 долари, што е за 26 проценти помалку отколку пред неколку дена.
Не е тешко да се објасни зошто Аргентина и Англија предизвикуваат толкав интерес. Актуелниот светски шампион Аргентина има огромна база на навивачи низ Соединетите Американски Држави, а особено во Атланта, каде што локалниот клуб Атланта јунајтед со години негува силни врски со аргентинскиот фудбал.
Покрај тоа, станува збор за дуел на две фудбалски велесили со богата историја и големо ривалство, што дополнително ја зголемува побарувачката за билети.
Високи се и цените за натпреварот за третото место, кој ќе се игра во Мајами. За влез на стадионот потребно е да се издвојат најмалку 1.543 долари.
Сепак, најскапо ќе биде големото финале на Светското првенство. Во моментов, најевтиниот билет за натпреварот за светската титула чини неверојатни 6.760 долари. Иако цената е намалена за шест проценти во однос на претходните денови, таа и понатаму останува недостижна за голем дел од навивачите.
Јасно е дека завршницата на Мундијалот предизвикува огромен интерес, а побарувачката за билети ги турка цените на рекордно високо ниво.
