Сите патишта во Србија водат во Нови Сад! Илјадници студенти, пеш и со велосипеди ќе пристигнат за годишнината од трагедијата на железничката станица

Десетици илјади луѓе веќе се упатуваат кон Нови Сад, каде што утре ќе се одржи она што би можело да биде најголемиот митинг во српската историја, на годишнината од трагичната смрт на 16 лица при уривањето на настрешница на железничката станица во Нови Сад.

Студентите пристигнуваат пеш и со велосипеди од цела Војводина и Србија, а најдолгата дистанца ќе ја поминат оние од Нови Пазар кои тргнаа кон Нови Сад за да ја одбележат годишнината од трагедијата на 16 октомври и ќе поминат речиси 400 километри.

Околу 13 часот пристигна вест дека патничките возови за Нови Сад се откажани. Медиумските извештаи објавија дека возовите нема да сообраќаат ниту попладне, ниту утре наутро.

Илјадници студенти пристигнуваат во Нови Сад: Утре комеморативен собир на годишнината од падот на настрешницата на железничката станица

Ден пред најавениот голем комеморативен митинг по повод годишнината од падот на настрешницата на железничката станица во Нови Сад, железничкиот сообраќај беше нарушен на неколку линии во Србија. Воз беше запрен во Инѓија, Војводина, а според пратеничката на Партијата за слобода и правда, Јелена Милошевиќ, возот беше запрен и во Смедеревска Паланка, каде што патниците беа евакуирани, додека возот кај Ресник исто така не сообраќа. Поаѓањата од Белград се откажуваат едно по друго.

Патниците велат дека возот што се упатува кон Суботица е запрен во Нови Сад, додека според податоците од апликацијата „Србија Воз“, сите возови на релацијата Нови Београд – Петроварадин се откажани.

Полицијата во Нови Сад го уапси Миша Бачулов, член на градскиот совет и претседател на граѓанската група „Биди херој“. Дел од медиумите во Србија тврдат дека постои сомневање дека Бачулов планирал да го лажира сопственото труење и да го обвини српскиот претседател Александар Вучиќ и државниот врв за обид за убиство.

Според нивните извори, целта на наводната инсценација била да се предизвика бунт кај граѓаните за време на утрешните протести во Нови Сад и да се поттикнат конфликти и насилство на улиците.

Бачулов, познат по своите критички изјави против владата, претходно учествувал во организирање протести и политички акции на опозицијата во Војводина. Министерството за внатрешни работи сè уште официјално не ги објави деталите за апсењето.