Сите гледаа во нејзиниот врат: Марго Роби на премиерата на „Оркански височини“ со легендарниот ѓердан на Елизабет Тејлор/ФОТО

Марго Роби го украде шоуто на холивудската премиера на „Wuthering Heights“. Таа блескаше во фустан од бајките, збогатувајќи го својот изглед со легендарен ѓердан кој раскажува приказна за три големи љубовни приказни, вклучувајќи ја и познатата помеѓу Ричард Бартон и Елизабет Тејлор. Актерката се појави во фустан кој неодамна беше претставен на светот на Неделата на модата во Париз. По серија смели и откривачки модни изданија, актерката направи впечатлив пресврт со овој избор, потсетувајќи ја јавноста колку всушност ѝ недостасува ваков вид безвременска елеганција.

Овој стилски пресврт му се припишува и на нејзиниот стилист Ендру Мукамал, кој ја водеше Марго Роби до едно од најпаметните модни изданија во нејзината кариера. Актерката на црвениот тепих истакна дека богатата историја на дијамантскиот ѓердан Таџ Махал совршено ја надополнува естетиката на модната куќа „Скијапарели“, создавајќи комбинација што делува истовремено моќно и безвременско.

Таа нагласи дека фустанот совршено ја евоцира атмосферата на „Оркански височини“, додавајќи дека доколку истоимениот роман на Емили Бронте од 1847 година може да се преведе во облека, тој би изгледал токму вака. Актерката не го криеше своето возбудување или среќа поради фактот што го носеше иконскиот ѓердан што некогаш ѝ припаѓаше на легендарната Елизабет Тејлор.

Марго Роби го надополни изгледот со обетки од Лорејн Шварц и дијамантски прстен од Фред Лејтон од 19 век, дополнително нагласувајќи го безвременскиот луксуз на целиот стил.

Легендарниот ѓердан на Елизабет Тејлор
Дијамантот Таџ Махал во облик на срце датира од 17 век и носи силна љубовна симболика. Првично ѝ припаѓал на моголската царица Нур Џахан, која го добила овој луксузен скапоцен камен како подарок од нејзиниот сопруг, царот Џахангир. Дијамантот е гравиран со натпис на персиски јазик „Љубовта е вечна“, заедно со името на царицата, дополнително нагласувајќи ја неговата емоционална вредност.

По неа, дијамантот го наследил нивниот син, царот Шах Џахан, кој го подарил на својата сакана сопруга Мумтаз Махал. По нејзината прерана смрт, Шах Џахан ја нарачал изградбата на величествениот мавзолеј на Таџ Махал како знак на вечна љубов, по што подоцна бил именуван овој легендарен дијамант.

Во средината на 20 век, куќата за накит „Картие“ стана сопственик на овој легендарен дијамант и го смести во современа огрлица од злато, рубини и дијаманти. Ричард Бартон ја купи оваа огрлица за да ја изненади Елизабет Тејлор, подарувајќи ѝ ја по повод нејзиниот 40-ти роденден, кој холивудската дива го прослави во Будимпешта. Бартон издвои 350.000 фунти за ова спектакуларно парче накит.

Бартон се пошегува во оваа пригода дека „ќе го купи Таџ Махал за својата сакана, но транспортот би чинел премногу“, пишува „ИнСтајл“. Бидејќи познатата дива е родена на 27 февруари, само четиринаесет дена по Денот на вљубените, овој подарок имаше и силна симболична тежина.

По смртта на Елизабет Тејлор во 2011 година, огрлицата заврши во „Кристи“, каде што беше продадена на анонимен купувач за дури 8,8 милиони долари, поставувајќи рекорд како најскапо парче накит од индиско потекло некогаш продадено на аукција.

Купувачот потоа побара да ја поништи продажбата, тврдејќи дека дијамантот можеби не потекнува директно од времето на владеењето на Шах Џахан. Сепак, судбината на иконскиот ѓердан останува обвиткана во мистерија, бидејќи идентитетот на неговиот сегашен сопственик никогаш не е јавно откриен.

 

View this post on Instagram

 

A post shared by Margot Robbie (@margotrobbieofficial)