„Сирија повеќе не е закана“: Ал-Шара со Трамп во Вашингтон – од Ал-Каеда до Белата куќа

Сирискиот претседател Ахмед ал-Шара изјави дека неговата посета на Белата куќа и средбата со американскиот претседател Доналд Трамп означуваат нов почеток во стратешките односи меѓу двете земји.

Ал-Шара, кој се сретна со Трамп во Белата куќа во понеделник, во интервју за Фокс њуз изјави дека Сирија повеќе не претставува закана за Вашингтон, туку станува негов геополитички сојузник.

– Во последните 60 години, Сирија беше изолирана од светот, а односите меѓу Дамаск и Вашингтон се прекинати. Ова е прв пат сириски претседател да ја посети Белата куќа откако Сирија беше основана во 1940-тите, рече Ал-Шара. Тој рече дека за време на разговорот со Трамп биле разгледани сегашноста и иднината на односите, вклучително и можноста за американски инвестиции во Сирија, особено во секторот за екстракција на гас.

– Целта е Сирија повеќе да не се гледа како безбедносна закана, туку како геополитички сојузник и земја во која САД можат значително да инвестираат, особено во екстракција на гас, рече Ал-Шара.

Тој потврди дека разговарале и за укинување на санкциите, додавајќи дека Советот за безбедност на Обединетите нации одлучил да ги укине санкциите што му се наметнати нему и на неколку други сириски функционери.

Зборувајќи за улогата на Сирија во меѓународната коалиција против Исламската држава, Ал-Шара рече дека земјата претрпела големи загуби во борбата против терористичката група и дека военото присуство на САД во Сирија сега мора да се координира со сириската влада.

На прашање за евентуалното пристапување на Сирија кон Аврамовиот договор со Израел, Ал-Шара истакна дека ситуацијата во која се наоѓа Сирија е различна од другите потписници, бидејќи земјата дели граница со Израел, кој, како што изјави, ги окупира Голанските висорамнини од 1967 година.

– Можеби администрацијата на Трамп може да ни помогне да постигнеме безбедносен договор со Израел или да се вратиме на договорот од 1974 година, рече тој.

Зборувајќи за прашањето на одговорност за воените злосторства и судбината на поранешниот сириски претседател Башар ал-Асад, Ал-Шара рече дека правдата „мора да си го направи својот тек“ и дека е формиран комитет за транзициска правда кој ќе се справи со одговорноста на сите сторители.

Како што објави Ројтерс, Ал-Шара, исто така, рече дека неговата поврзаност со Ал-Каеда е „нешто од минатото“ и дека за тоа не се разговарало за време на средбата со Трамп.