Синот на основачот на Хамас стана христијанин: Сега е борец против исламот, а бил и шпион

Приказната за Моаб Хасан Јусеф е несекојдневна. Синот на Хасан Јусеф, познатиот основач и „духовен водач“ на Хамас, го прифатил Христос како свој спасител и оттогаш неуморно работи во борбата против радикалниот ислам.

Моаб Хасан Јусеф е роден во Рамала, на Западниот Брег на Палестина. Како дете, фрлал камења по израелски тенкови, а кога пораснал, сакал да биде „борец“ како што се очекувало од децата во Палестина. Неговиот татко е Хасан Јусеф, еден од основачите на Хамас.

Во текот на 1990-тите, Моаб бил затвореник во израелски затвор. Таму почнале да растат неговите сомнежи за исламот и Хамас.

Тој со свои очи бил сведок, како што тврди, на суровата бруталност што затворените членови на Хамас ја нанесувале врз другите затвореници. Откако бил држен во заробеништво од членовите на внатрешната разузнавачка служба Шин Бет, тој се согласил да стане шпион.

Моаб се сметал за „највредниот капитал“ на Шин Бет во Хамас. Се проценува дека стотици животи биле спасени благодарение на информациите што ги дал, главно со спречување на бомбашите самоубијци да стигнат до своите цели.

Неговата средба со христијанството започнала кога еден христијански таксист во Газа го поканил да ја проучува Библијата во 1999 година. Тој рекол дека најмногу го инспирирала Исусовата „Проповед на гората“.

Во 2004 година, тајно бил крстен и ја прифатил христијанската вера. Откако се преселил во Соединетите Држави во 2006 година, Моав решил јавно да го објави своето преобраќање, иако тоа значело сериозна опасност за неговиот живот од екстремисти.

Денес, тој не ја открива точната локација на неговото живеалиште од безбедносни причини, но е посветен на ширење на христијанската порака за љубовта и застапување за промена на екстремистичките идеологии на омраза преку учењата за љубовта и простувањето.

Понекогаш проповеда во црква, а неговите проповеди и јавни говори привлекуваат илјадници луѓе во публика. Тој верува дека исламот е во состојба на „опаѓање“, а неговата мисија денес е да ги покани муслиманите да ја проучуваат Библијата со надеж дека ќе ја прифатат нејзината порака и Исус Христос како свој Бог.

Сепак, оваа позиција воопшто не е сигурна. Тој бил прогонуван, етикетиран како предавник и добил бројни смртни закани поради својата порака. Отпадништвото од исламот е грев што се казнува со смрт според исламскиот закон.