Синер ѝ заби нож во грб на Италија 

Најдобриот италијански тенисер, Јаник Синер, одлучи да не игра за својата земја на претстојниот Дејвис куп. Италија на тој начин ќе остане без својот најголем адут во борбата за нов трофеј по неочекуваната одлука на Синер, донесена веднаш по освојувањето на егзибицискиот турнир „Шест крала“, за кој доби шест милиони долари.

Потоа, Јаник Синер објасни дека е уморен и дека неговиот календар е преполн, па затоа нема да може да игра за својата родна земја. Размислуваше добро да се одмори и да биде подготвен за Отвореното првенство на Австралија, кое му е поважно од Дејвис купот.

„Веќе двапати го освоив Дејвис купот“, рече Јаник Синер, заборавајќи дека двапати го освои и Отвореното првенство на Австралија: „Јас и мојот тим ја донесовме оваа одлука бидејќи сезоната е многу долга и треба да ја започнам следната сезона една недела порано. Мојата цел е да бидам во најдобра форма во Австралија, а во последните две години не можев да го направам тоа поради недостаток на време.“
Тренерот на италијанската екипа од Дејвис купот, Филипо Воландри, ги избра Лоренцо Мусети, Матео Беретини, Флавио Коболи, Симоме Болели и Андреа Вавасори со кои повторно ќе се обиде да го нападне трофејот.

„Синер рече дека не може. Сигурен сум дека ќе се врати, ова е неговиот дом“, рече Воландри.

Како што се очекуваше, навивачите не ја примија добро оваа вест. Иако Воландри се обиде да ја „испушти топката“, италијанските медиуми го критикуваа и Синер откако се откажа без доволно добра причина. Затоа претседателот на Италијанската тениска асоцијација, Анџело Бинаџи, мораше да се огласи.

„Тоа е одлука што ја разбираме и ја почитуваме, иако е многу болна за нас. Сигурни сме дека тој повторно ќе го носи дресот на Италија со истата бестрашност и решителност што ги имаше досега“, рече Бинаџи.

Финалниот турнир на Дејвис купот се игра во Болоња во ноември и учествуваат вкупно осум национални селекции. На едната страна од ждрепката се Италија – Австрија и Франција – – Белгија, додека на другата страна се Шпанија – Чешка и Аргентина – Германија. По оставката на Синер, сега Шпанија со Алкараз е фаворит за титулата.