Поради лошите временски услови проследени со силен ветар и бранови, маратонците на 38. издание на Охридскиот пливачки маратон не испливаа до целта. Силните бранови беа голема пречка за 16-мина, кои мораа предвреме да излезат од езерото во близина на хотелот „Гранит“ и да останат без громогласниот аплауз од публиката која ги чекаше на целта. Организаторот одлучи да го прекине натпреварот и да ги награди дотогаш најдобро рангираните. Покровителот на настанот, претседателката Гордана Сиљановска-Давкова, им честиташе на победниците и на сите учесници на маратонот, изразувајќи им признание за издржливоста, посветеноста и за спортскиот дух, и им ги врачи наградите.
Инаку, оваа година Охридскиот маратон броеше шеснаесет пливачи, десет во машка и шест во женска конкуренција, кои стартуваа од Свети Наум, а на охридското пристаниште се очекуваше да пристигнат околу 16 часот. Сепак, временските услови не го дозволија тоа, па трката беше прекината еден час и половина пред целта.
Најбрзи во машка конкуренција беа Италијанците Матео Фурлан и Федерико Тамборино, како и Аргентинецот Матијас Дијас Хернандес, додека кај дамите најбрза во тој временски интервал беше Аргентинката Мајте Ајлен Пука. Вреди да се спомене дека покрај наградените, свој придонес имаа и Елена Лионело (Италија), Росана Гошева (Македонија), Алисја Гедриш (Полска), Милица Љубисављевиќ (Србија), Ерика Абигал Јенсен (Аргентина), како и кај мажите Александар Илиевски, Леонид Мишевски, Петар Цеков и Лазар Поп Трајков од Македонија, потоа Акуилес Балаудо и Матиас Дијас Хернандес од Аргентина, Италијанците Федерико Тамборино, Марко Инглима и Матео Фурлан, како и Хуго Риберио од Португалија, кои направија овој настан да добие на своја тежина, пред сè поради лошите временски услови со кои се соочија за време на нивното патешествие.
Наградниот фонд, како што информираше организаторот, изнесуваше 15.000 евра. Инаку, Охридскиот пливачки маратон и оваа година беше дел од Фестивалот на спортови на вода.
Во продолжение и фотогалерија од врачувањето на наградите на најдобрите:
