Силна бура предизвика циклонска плима во Хрватска: Шеталиштата потопени, парализиран поморскиот сообраќај/ФОТО/ВИДЕО

Силна бура проследена со силни ветрови и обилни врнежи од дожд ги погоди крајбрежните области во Хрватска, најтешко во Далмација, каде што комбинацијата од низок притисок и бурен јужен ветер предизвикува силна циклонска плима.

Како што објави порталот 24sata.hr, морето во Каштела се излеало на локалното пристаниште и ги претворило шеталиштата во плитка вода. Снимките покажуваат дека нивото на морето достигнува до праговите на зградите и го прави речиси невозможно движењето по брегот.

Слична е ситуацијата и во Тисно, а не е подобра ни во Цриквеница, каде што крајбрежјето е исто така под морето.

„Морето се излеа врз крајбрежјето и го потопи. За среќа, јужниот ветер ослабна, но сè уште дува силно и врне“, рече еден од жителите на Цриквеница.

Времето го парализираше поморскиот сообраќај
Поради неповолните временски услови, неколку линии за катамарани, фериботи и бродови по Јадранското Море се суспендирани, соопшти Хрватското здружение за крајбрежен туризам.

Катамараните не сообраќаат на линиите Сплит – Стари Град, Сплит – Бол – Јелса, Мали Лошињ – Цреш – Риека, Новаља – Раб – Риека, Олиб – Силба – Премуда – Задар, како и на неколку линии од областа на Задар, вклучувајќи ги:

Задар – Молат – Бргуље – Запунтел – Ист, и Задар – Ривањ – Сеструњ – Зверинац – Божава – Брбињ. Во прекин се и линиите Задар – Иж Мали – Вели Иж – Рава Мала – Рава и Милна – Рогач – Сплит.

Во прекин е и сообраќајот на траектните линии Сумартин – Макарска, Задар (Гаженица) – Ривањ – Сеструњ – Зверинац – Молат, Лопар – Валбиска, Шибеник – Зларин – Каприје – Жирје и Брестова – Порозина.

Не сообраќаат ниту бродските линии Задар – Сали – Заглав – Задар, Дубровник – Колочеп – Лопуд – Суѓураѓ, Задар – Преко и Мали Лошињ – Уније – Шушак.

https://t.co/3RsTIVQOuN

— Dalmacija Danas (@Dalmacija_Danas) February 19, 2026