Си-Ен-Ен дознава: Администрацијата на Трамп барала авион од Катар, не се работи за „подарок“

Администрацијата на американскиот претседател Доналд Трамп прва стапиla во контакт со Катар за да се распраша за можноста за купување на авион Боинг 747 кој ќе служи како привремена замена за претседателскиот авион Ер Форс 1, изјавија за Си-Ен-Ен повеќе извори запознаени со дискусиите. Оваа верзија на настаните е во спротивност со тврдењата на Трамп дека Катар го понудил авионот како „подарок“.

Откако Трамп ја презеде функцијата во јануари, Пентагон контактираше со Боинг, но му беше кажано дека новиот авион нема да биде готов уште најмалку две години. Затоа, Белата куќа, во потрага по побрзо решение, ги овласти воздухопловните сили да истражуваат алтернативни опции.

Според висок функционер во Белата куќа, пратеникот на Трамп за Блискиот Исток, Стив Виткоф, составил листа на достапни авиони ширум светот, вклучително и еден од Катар.

Пентагон го иницираше контактот, Катар беше подготвен да го продаде

Изворите велат дека Пентагон, со помош на Боинг, ги идентификувал корисниците на авиони кои би можеле да служат како привремен претседателски авион. Катар беше еден од нив. Откако Белата куќа даде зелено светло, Пентагон контактираше со катарските власти и побарале да купат. Според изворите, Катар бил подготвен за продажба, а првично се размислувало дури и за изнајмување.

Меѓутоа, Трамп јавно тврдеше дека тоа е „гест“ од катарското кралско семејство и дека станува збор за „подарок, без компензација“. Тој рече дека ќе го користи авионот привремено, а потоа ќе го донира на својата претседателска библиотека.

Веста за потенцијалното купување предизвика жестоки политички реакции. Демократските пратеници, како и некои републиканци блиски до Трамп, изразија загриженост за етичките импликации на договорот. Тие се заканија и дека ќе ја блокираат продажбата на оружје на Катар.

За време на неодамнешната посета на Блискиот Исток, Трамп рече дека нема да одбие „бесплатен, многу скап авион“ и го опиша како „одличен гест“. Во февруари, тој лично обиколи катарски авион додека беше паркиран во Палм Бич, во близина на неговото одморалиште Мар-а-Лаго.

Белата куќа во неколку наврати нагласи дека евентуалното пренесување на авионите ќе се изврши легално, преку договор меѓу Министерството за одбрана на Катар и американскиот Пентагон.

Катарскиот премиер Мохамед бин Абдулрахман Ал Тани рече дека се работи за меѓувладин договор кој се уште е предмет на правна анализа. „Доколку на САД им треба нешто и ако е легално, ние сме подготвени да помогнеме. Но, ако се утврди дека трансакцијата е нелегална, понудата ќе биде повлечена“, рече Ал Тани.

Претворањето на користен авион во претседателски авион претставува огромен технички предизвик. Безбедносните служби би морале речиси целосно да го демонтираат авионот и да го опремат со најнапредните комуникациски и безбедносни системи, што би можело да потрае и до две години и значително да ја надмине вредноста на самиот авион.

Патем, авионите 747-800 на Боинг, наменети трајно да го заменат Air Force One, не треба да бидат испорачани до 2027 година, пет години подоцна од првично планираното. Трамп претходно изјави дека е „незадоволен“ од доцнењето.