Штрајк против владините социоекономски реформи: Белгија три дена ќе биде без превоз, нема да работат училиштата, ќе сопрат комуналните услуги…  

Во организација на трите најголеми синдикати, во Белгија денеска почнаа серија штрајкови, кои ќе кулминираат в среда со 24-часовен генерален штрајк.

Штрајковите се во знак на протест против социоекономските реформи на белгиската Федерална влада. Синдикатите обвинуваат дека со новите мерки се намалуваат пензиите и социјалната помош, се зголемува ДДВ и, како што тврдат, се ограничуваат правата на работниците. Меѓу барањата на синдикатите, покрај повлекување на овие мерки, се и воведување даноци за богатите и за дигиталните гиганти и укинување на безусловните субвенции за големите компании.

Серијата штрајкови почнаа со прекини на работата во јавниот транспорт. Денеска  штрајкуваат и јавните служби и образованието, додека в среда, во текот на генералниот штрајк, ним ќе им се приклучат и другите вработени во државниот и во приватниот сектор, вклучувајќи го и воздушниот сообраќај, кој ги откажа сите летови од и до Белгија.

До среда навечер нема да функционира ни железничкиот сообраќај на националните линии. Во текот на сите три дена од штрајкот се очекуваат значителни прекини во функционирањето на метрото, трамваите и на градските автобуси во Брисел, но не е познат точниот обем на прекините на линиите.

До 27 ноември во утринските часови, најавен е и целосен или делумен прекин на фериботскиот сообраќај од белгиските пристаништа.

Во штрајк се и комуналните служби, ќе има делумен прекин на поштенските услуги и се очекува штрајкот да има минимално влијание на работата на маркетите.

Во сите три дена ќе штрајкува и полицијата, согласно со полицискиот правилник за прекин на работата.