Што рече Путин пред утрешната средба со Трамп?

Администрацијата на американскиот претседател Доналд Трамп вложува енергични напори за прекин на конфликтот во Украина, изјави рускиот претседател Владимир Путин.

„Како што сите знаат, тие, според мене, вложуваат доста енергични и искрени напори за прекин на конфликтите и кризата и за постигнување договори што се во интерес на сите страни во конфликтот, со цел да се создадат долгорочни услови за мир меѓу нашите земји, но и во Европа и светот како целина“, рече Путин на состанокот со високи функционери на руското раководство, претставници на Владата и претседателската администрација.

Путин рече дека планира да ги информира учесниците на состанокот за текот на преговарачкиот процес за решавање на украинското прашање, како и за моменталната фаза на Русија и САД.

Рускиот лидер нагласи дека не ја исклучува можноста следната фаза од контактите со САД да биде постигнување договор за Новиот договор за намалување на стратешкото оружје (Нов СТАРТ).

Путин го свика состанокот како дел од подготовките за утрешните разговори со Трамп и американската делегација во Алјаска.