Што пишува во документот предложен од Универзитетот во Белград како решение за кризата?

Универзитетот во Белград се усогласи и на студентите им презентираше документ во кој, како што се наведува, се предлага „решение за излез од кризата“. Според Н1, документот бил потпишан од Ректорската управа и деканите и предложен до студентите, а сега се чека на нивниот одговор.

Деканката на Филолошкиот факултет во Белград, Ива Драшкиќ Виќановиќ, за Инсајдер изјави дека сега се чека одговорот на студентите по состанок што го имале во понедленикот со 31 декан, ректори и студенти, претставници од сите факултети.

Според неа, „пет или шест часа“ разговарале за сите аспекти на моменталната состојба на академската заедница и сега се чека одговор од студентите.

Што пишува во документот потпишан од Ректорската управа и деканите, а кој го објави Н1:

„Имајќи ја предвид сложеноста на ситуацијата во која се наоѓа универзитетот и динамиката на актуелните општествени и политички настани и почитувајќи ја различноста на ставови, верувања и аспирации како кај наставниците така и кај студентите, сакаме да понудиме механизам со кој Универзитетот: 1) ќе продолжи да ги поддржува студентите во борбата за поправедно општество; 2) ќе ги заштити сите свои студенти и сите свои вработени и со тоа 3) ќе ја брани и својата автономија и својата општествена улога.

Прашањето за одговорноста и валидноста на постапките на институцијата првично го покренаа студентите преку нивните четири барања, а тие го привлекоа вниманието на јавноста со неколкумесечно блокирање на факултетот. Во ова, тие беа поддржани од речиси сите професори и застанаа заедно со нив под покровителство на универзитетската автономија, како и во заедничка и оправдана реакција на општествените проблеми од најголемо значење.

Социјалното движење на студентите во блокадата неодамна влезе во ново поле на дејствување, одлучувајќи се за политичка артикулација на своите ставови во форма на барање за вонредни парламентарни избори. Иако голем број наставници ја поздравија оваа одлука, професорите и студентите можат да ја поминат оваа фаза од заедничкиот пат само како граѓани.

Универзитетот не може да ги следи студенти во блокада во изборниот процес, но може да остане нивен сигурен партнер во заштитата на студентските барања до нивното исполнување и во борбата за уставните принципи и вредности врз кои тие се темелат.

Со цел да се зачува единството на универзитетската заедница и заеднички да се спротивставиме на невидените притисоци со кои се соочува, предлагаме заедничко дејствување на студентите, наставниот и ненаставниот кадар од сите факултети на Универзитетот во Белград.

Во случај на продолжување на наставата, Универзитетот во Белград е подготвен да преговара со претставници на Владата на Република Србија и Министерството за образование.