Што крие Иран во своите нуклеарни постројки?

Генералниот директор на Меѓународната агенција за атомска енергија (МААЕ) Рафаел Гроси изјави за Си-Ен-Ен дека Иран има складирано околу 400 килограми ураниум збогатен до 60 отсто, што не е далеку од збогатувањето од 90 отсто потребно за производство на нуклеарно оружје.

„Иран не криеше дека го заштитил овој материјал“, изјави Гроси за Си-Ен-Ен.

Говорејќи пред Одборот на гувернери на нуклеарното надзорно тело на Обединетите нации, Гроси рече дека инспекторите мора да можат „да се вратат во иранските нуклеарни постројки и да направат увид на залихите на ураниум, вклучувајќи, најважно, 400 килограми 60 отсто збогатен ураниум“.

Гроси изјави за Си-Ен-Ен дека инспекторите на Меѓународната агенција за атомска енергија (МААЕ) последен пат ги виделе залихите на 10 јуни, само три дена пред Израел да изврши напади врз Иран, главно насочени кон нуклеарните постројки во Исфахан и Натанц. Соединетите Држави се приклучија на израелските напади во неделата, погодувајќи ги овие два објекти, како и објектот за збогатување во Фордо, кој се наоѓа длабоко во планините, се вели во текстот.

Во своето обраќање до Управниот одбор на МААЕ, Гроси рече дека иранскиот министер за надворешни работи Абас Арагчи му рекол на 13 јуни – кратко по првичниот израелски напад – дека Иран „ќе донесе специјални мерки за заштита на нашата нуклеарна опрема и материјали“.

Гроси рече дека му нагласил на Арагчи дека Иран мора да ја извести МААЕ каде пренесува каков било нуклеарен материјал, наведува Си-Ен-Ен.

Тој исто така повика на прекин на огнот за „Иран да може да им дозволи на тимовите на МААЕ пристап до објектите за да ја проценат ситуацијата“.

Помалку од 1 процент од природниот ураниум е ураниум-235 (У-235), изотоп што се користи во реактори и бомби, пишува Си-Ен-Ен. За да биде употреблив, особено за оружје, подоминантниот ураниум-238 (У-238) мора да се отстрани, а нивото на У-235 да се зголеми преку процесот на збогатување, пишува Си-Ен-Ен во анализата.