Што ако ви е откажан летот? Платформите за резервации се обврзаа дека ќе им ги вратат парите на патниците за краток рок

Многу патници се соочуваат со долги доцнења во враќањето на парите за откажани летови резервирани преку трети страни, како што се платформите за онлајн резервации на патувања.

Expedia и Lastminute.com, двете најголеми европски платформи за онлајн резервации на патувања, ветија дека ќе го подобрат својот процес на враќање на парите и ќе обезбедат појасни информации за правата на патниците. Промената има за цел да им го олесни на патниците добивањето на поврат на парите преку овие платформи кога авиокомпаниите откажуваат летови и да обезбеди појасни информации за правата што патниците ги имаат според законите на ЕУ.

Оваа иницијативата следува по разговорите со Европската комисија и Мрежата за соработка за заштита на потрошувачите (CPC), мрежа на национални агенции кои ги спроведуваат законите на ЕУ за заштита на потрошувачите.

Ако резервирате лет преку Expedia или Lastminute.com и авиокомпанијата го откаже, сега имате право на поврат на парите во рок од 14 дена. Ова вклучува седум дена за авиокомпанијата да му ги врати парите на агентот и дополнителни седум дена за агентот да ви ги префрли парите.

Претходно, многу патници чекаа месеци за враќање на парите за откажани летови. Двете компании изјавија дека сега ги решиле сите заостанувања во исплатите.

Исто така, на патниците ќе им биде полесно да контактираат со овие агенции. Нивните контакт информации, вклучувајќи телефонски броеви и е-адреси, ќе бидат достапни во деловите за поддршка или „контактирајте не“ на нивните веб-страници. Двете компании се обврзаа јасно да ги објаснат правата на патниците во случај на откажување на лет. Ова го вклучува правото на избор помеѓу пренасочување или враќање на парите, во согласност со правилата на ЕУ за правата на патниците во воздушниот сообраќај.

Lastminute.com изјави дека започнал со спроведување на новите мерки од 1 јули 2025 година и целосно ќе ги спроведе до 1 септември 2025 година. Expedia вели дека нејзините тековни практики се веќе во согласност со нејзините обврски. Ова е дел од пошироките напори на ЕУ за подобрување на заштитата на потрошувачите во туристичкиот сектор, а компаниите се приклучуваат на три други агенции, Edreams ODIGEO, Etraveli Group и Kiwi.com, кои се обврзаа на истите најдобри практики уште во 2023 година.

Според сегашните правила на ЕУ, ако авиокомпанијата го откаже вашиот лет, имате право на пренасочување или целосно враќање на парите во рок од седум дена од вашето барање. Исто така, може да имате право на надомест ако авиокомпанијата е одговорна за откажувањето. Сепак, може да биде потешко да се добие враќање на парите ако летот е резервиран преку трета страна, како што е онлајн туристичка агенција. Обврските преземени од Expedia и Lastminute.com имаат за цел да го премостат овој јаз, така што ќе чекате максимум 14 дена дури и ако е вклучена трета страна.

Во 2023 година, Европската комисија предложи нови правила за патувања што вклучуваат повеќе начини на транспорт, како што е комбинација од воз и автобус. Доколку се усвојат, овие правила би го вклучиле истиот рок за враќање на парите преку посредници во случај на откажување на летови. Предлогот за овие нови правила сè уште е во процес на преговори меѓу пратениците на ЕУ.