Шпионска афера: Хрватски пилот и српска државјанка од Косово пренесувале доверливи информации во корист на Србија

На војниот пилот на Хрватското воено воздухопловство Ј.И. од Сплит и неговата девојка А.М. од Косовска Митровица им е одреден мерка притвор доцна во средата, по неколкучасовно испрашување, пишуваат хрватските медиуми. Нему му е одреден мерка притвор поради ризик од влијание врз сведоци, односно дека може да уништи, сокрие или измени докази важни за кривичната постапка, а на неа ѝ е одреден мерка притвор поради ризик од бегство, бидејќи е странска државјанка, соопшти судот во Сплит.

Како што дознава 24sata од извор близок до истрагата, пилотот е запознаен со обвиненијата против него и ја презентирал својата одбрана пред судот за време на рочиштето за мерката притвор.

Постапката против нив ја водат цивилната и воената полиција и Европол.

Пилотот и неговата девојка се обвинети за шпионажа во корист на Србија. Како што објави „Слободна Далмација“, шпионската сага почнала да се расплетува откако двојката била уапсена пред еден месец на Вис, каде што биле на одмор. Иако причините за тоа првично апсење не се официјално познати, пилотот набрзо бил ослободен. На неговата партнерка ѝ било наредено да биде сместена во Транзитниот прифатен центар за странци „Триљ“, по што требало да биде протерана од Хрватска на 10 години.

Сепак, при пребарувањето на нивните мобилни телефони биле откриени комуникации што укажувале на пренесување на доверливи информации до српски политичари. Станува збор за податоци што Ј. И. ги собрал за време на неговата служба во Косово како член на хрватскиот контингент (HRVCON) како дел од мировната мисија КФОР предводена од НАТО. По овие откритија, двајцата биле повторно уапсени.

Според неофицијални информации, А. М. добила информации од својот партнер за движењата и плановите на силите на КФОР во северно Косово, кои потоа ги проследила до лидерите на Српската листа, главната политичка партија на Србите во Косово која тесно соработува со властите во Белград. Истражителите велат дека размениле пораки преку WhatsApp, а во комуникацијата се споменува и новинар од меѓународна агенција кој исто така добил информации.

Идентификувани се најмалку четири случаи на протекување на класифицирани информации. Едниот се однесува на операциите на КФОР во Зубин Поток, каде што често се јавуваа тензии меѓу локалните Срби и косовските власти. Другиот е поврзан со апсењето на Дејан Пантиќ, поранешен припадник на косовската полиција, чие притворање во декември 2022 година предизвика немири и блокади на граничните премини со Србија.

Истрагата, исто така, покажа дека А. М. работела во Мисијата на Европската Унија за владеење на правото (ЕУЛЕКС) и во мисијата УНМИК, и дека имала контакти со бројни судии и обвинители. Според изворите, таа дури се обидела да уценува некои од нив. Таа била блиска и со некои истакнати претставници на српската заедница во Косово, вклучувајќи ги и лидерите на невладините организации и политичките структури одговорни за создавање на Заедницата на српски општини.

Српските разузнавачки служби, тврдат изворите, систематски го поттикнувале вработувањето на Срби во меѓународните институции во Косово, користејќи ги нивните позиции за собирање информации и вршење притисок врз судските процеси.