Бразилскиот фудбалер Оскар е принуден да ја заврши својата фудбалска кариера. Причината се срцевите проблеми што 34-годишникот ги имаше пред неколку дена во тренинг центарот на тимот од Сао Паоло.
За среќа брилијантниот офанзивен играч од средниот ред добро пројде, а можеше да заврши фатално за него откако му се слоши за време на тестовите.
„Се очекува Оскар да ја заврши кариерата. Играчот од средниот ред бара начин да го раскине договорот со Сао Паоло и шансите тоа да се случи се големи“, објавуваат бразилските медиуми, опишувајќи ги деталите од драмата.
„Му се слоши за време на лекарскиот преглед. Дојде да направи проверка откако неодамна беа откриени некои неправилности во неговото срце. Тоа се случи во август, но доби зелено светло да настапува. Рече дека ќе ја заврши кариерата во случај на какви било проблеми.“
За жал на крајот се појавија проблеми, а направените тестови донесоа шокантни сцени.
„Тој беше тестиран на велосипед кога му се слоши. Падна на земја и остана во несвест околу две минути. Лекарите брзо реагираа и беше однесен во болница, каде што ќе остане во догледно време.“
Се очекува 34-годишникот да ја заврши кариерата по овие сцени, а Сао Паоло не сакаше да дава премногу детали во јавноста и нагласи дека ги замолува сите да ја почитуваат приватноста на играчот.
Оскар се врати дома оваа година по пауза од 13 години. Некогаш се сметаше за најголем талент во Бразил и тоа му донесе трансфер во Челзи во 2012 година.
Помина пет години на „Стемфорд Бриџ“, играјќи навистина феноменално, но во 2017 година повикот за пари го однесе во Кина, каде што остана до минатата година.
Не можеше да ги одбие огромните бројки. Заработи повеќе од 200 милиони евра нето од договорот и јавно призна дека отишол во Кина за парите. Неговата изјава долги години беше главна тема во фудбалскиот свет.
