„Сондер Холдингс Инк“, позната по издавање луксузни апартмани и мали хотели преку дигитална платформа, објави дека ќе поднесе барање за стечај во Соединетите Американски Држави, што значи дека ќе престане со работа.
Компанијата, исто така, планира да поднесе барање за стечај во други земји каде што работи, објави „CNBC“.
Во соопштението, Сондер соопштува дека одлуката е поради сериозни финансиски ограничувања што произлегуваат од долгогодишни проблеми со интегрирањето на нејзините системи и аранжманите за резервации со „Мариот Интернешнл“. Овие технички и оперативни предизвици предизвикаа дополнителни трошоци и ги нарушија приходите на компанијата.
Одлуката за затворање дојде еден ден откако „Мариот“ го раскина договорот за лиценцирање со „Сондер“. Раскинувањето дополнително ја влоши ситуацијата и ја забрза одлуката за ликвидација.
По објавувањето на ликвидацијата, ситуацијата предизвика хаос кај патниците. Многу гости кои имаа резервации преку Сондер добија е-пошта во која се наведува дека мора да го напуштат својот сместувачки капацитет следниот ден. Хотелите и апартманите под управување на Сондер почнаа да ги затвораат своите врати.
