Шкендија ја чека долга европска сезона – обезбеди групна фаза!

Македонскиот фудбалски шампион, екипата на Шкендија, се пласираше во третото квалификациско коло за Лигата на шампионите, а со тоа обезбеди групна фаза во некое од европските натпреварувања.

Шкендија го елиминираше романскиот гигант ФЧСБ (поранешна Стеауа) со вкупен резултат 3:1 и го продолжува патот кон најпрестижното европско натпреварување. Овој успех значи дека клубот ќе игра најмалку во лигашката фаза од Конференциската лига, обезбедувајќи си стабилна финансиска поддршка и можност за натпревари против силни европски тимови.

Во третото квалификациско коло Шкендија ќе се соочи со шампионот на Азербејџан, тимот на Карабах, а во зависност од резултатот, тимот ќе игра или во плеј-офот за Лигата на шампионите или ќе се префрли во квалификациите за Лига Европа. Дури и ако биде елиминирана од Карабах и потоа загуби во плеј-офот за Лига Европа, Шкендија автоматски ќе влезе во групната фаза на Конференциската лига.

Финансиски, клубот веќе си обезбеди најмалку пет милиони евра само од учеството во квалификациите и групните фази. Ова вклучува приходи од ТВ-права, наградни фондови и продадени билети, без разлика дали ќе продолжи во Лигата на шампионите, Лига Европа или Конференциската лига.