Градот Шангај во источна Кина е погоден од топлотен бран 25-ти ден по ред со температури над 35 степени Целзиусови, со што е соборен рекордот за најдолг континуиран период на високи температури во речиси 100-годишната историја на градот.
Според општинската метеоролошка служба, претходниот рекорд од 24 последователни дена високи температури е поставен во 1926 година, кога високите температури траеле од 22 јули до 14 август, според кинеската новинска агенција „Синхуа“.
Кинескиот метеоролог Жу Сјуејан вели дека причината за тековниот топлотен бран лежи во абнормалниот метеоролошки изглед на суптропска област со висок притисок од северозападниот Пацифик.
„Системот со висок притисок е силен и стабилен над регионот на делтата на реката Јангце од почетокот на август, создавајќи услови погодни за долготраен топлотен бран“, изјави Жу за „Синхуа“.
