Тимот на Ферари во јануари објави дека Рикардо Адами повеќе нема да биде инженер на Хамилтон и дека е преместен на друга позиција во Скудерија. Тимот не коментираше понатаму за ова прашање, но се верува дека Карло Санти, кој претходно работеше со Кими Раиконен во Ферари, е привремено назначен на негово место.
Без да го спомене Санти, Хамилтон потврди дека повторно ќе ги смени инженерите во не толку далечна иднина.
- Тежок период е бидејќи не е долгорочно решение, решението што го имаме сега е само за неколку трки. Значи, на почетокот од сезоната ќе има уште една промена и ќе морам да работам со некој нов, што е лошо за сезона во која сакате да влезете со луѓе што работеле неколку сезони, поминале низ добро и лошо и се смирени – изјави Хамилтон за новинарите, по тестирањето во Бахреин, објави „Скај спортс“.
Хамилтон имаше тешкотии во комуникацијата со Адами минатата сезона, како што открија радиопораките објавени во текот на трката, но рече дека одлуката за промена на инженерите била тешка.
- Навистина сум благодарен за трудот и за трпението минатата година, што беше тешко за сите нас – рече Хамилтон.
Минатата година, првпат во својата кариера, Хамилтон не заврши на подиумот цела сезона.
Портпаролот на Ферари рече дека Хамилтон е во добри раце, додавајќи дека тимот бара вистинска личност и дека Хамилтон „не е ставен во неповолна положба“.
Зборувајќи за новите технички прописи во Формула 1, Хамилтон рече дека тие се смешно сложени и дека обожавателите нема да ги разберат. Тој се осврна на зголеменото ниво на управување со енергијата што го бараат новите мотори, кои имаат поделба на моќноста 50:50 меѓу моторот со внатрешно согорување и електричната страна на хибридните мотори.
- Бев на состанок и ни го презентираа. Како да ви треба диплома за целосно да го разберете – рече 41-годишниот возач.
Болидите ќе имаат активна аеродинамика за да се овозможи доволно енергија за да се обнови батеријата, употребата на целосно одржливо гориво е задолжителна, а болидите и гумите се помали. Она што ги комплицира работите е тоа што возачите можат да го користат копчето за зголемување на брзината за да добијат дополнителна моќност за полесно престигнување, но потоа ризикуваат да останат без моќност и повторно да бидат престигнати.
Новата сезона во Формула 1 започнува на 8 март, со Големата награда на Австралија во Мелбурн.
