Мирисот на варена пченка е вистински симбол на летото, кое го очекуваме преку целата година. На море, во парк, во двор – пченката е крцкава закуска што малкумина не ја сакаат.
Сега штом веќе се појави на пазарите и продавниците, сè повеќе луѓе ја подготвуваат дома. Index.hr споделува неколку совети како совршено да се зготви.
Колку време да се готви пченката?
Повеќето луѓе мислат дека пченката треба да се вари „најмалку половина час“, но всушност – тоа може да е предолго. Денешната слатка пченка (слаткиот вид што го купуваме на пазарите) е многу понежна и се готви побрзо. Идеалното време на готвење е од 5 до 7 минути во врела вода. Ако пченката е свежа и млада, доволно е и помалку. По само 3-4 минути, може да биде совршено мека и слатка.
Ако ја преварите пченката, таа ќе ја изгуби својата сочност, ќе стане тврда и малку гумена. Затоа, треба да се додава само кога водата врие и да се сервира веднаш по готвењето или потопено во путер.
Додавање сол или шеќер
Не додавајте сол во водата што се користи за варење на пченката, бидејќи може да ги направи зрната поцврсти. Наместо тоа, некои готвачи препорачуваат додавање лажичка шеќер – особено ако пченката не е ултра свежа, бидејќи тоа ја зголемува нејзината природна сладост. Можете исто така да додадете малку млеко и путер во водата за варење, што ќе резултира со покремест вкус и посјајна текстура на зрната.
Ако сакате да ја подготвите пченката на жар, прво можете да ја варите кратко (3-4 минути), а потоа да ја печете додека не добие златно-кафеави траги. Комбинацијата од чаден вкус и блага сладост е најдобрата летна закуска.
