„Сетете се што направи Путин со Крим“, предупреди Зеленски

Украинскиот претседател Володимир Зеленски предупреди дека откажувањето од кој било дел од украинската територија само ќе го охрабри рускиот лидер Владимир Путин и ќе послужи како лансирна рампа за идни напади врз Европа, освен ако континентот не остане непоколеблив во својата поддршка.

Зеленски нагласи дека повлекувањето од Донбас ќе го изложи Харков, град со 1,5 милиони луѓе, и ќе ѝ дозволи на Русија да го заземе клучниот индустриски центар на реката Днепар, објави „Киев пост“, а пренесе „Индекс“.

Изјавата доаѓа во контекст на предлозите на американскиот претседател Доналд Трамп, кој се залага за конечен мировен договор од средбата со Путин во август.

Трамп рече дека Зеленски би можел да ја заврши војната „речиси веднаш, ако сака“, но додаде дека Украина „не може да го врати“ Крим, сугерирајќи дека Киев ќе мора да се согласи на територијални отстапки во замена за мир. Зеленски постојано ги отфрла таквите идеи.

Во интервју за француското списание „Ле Поан“, Зеленски ја објасни стратегијата на Русија. „Некои медиуми тврдат дека ако украинските војници ги напуштат источните региони на нашата земја, таму ќе се врати мирот. Но, тоа не е вистина“, рече тој.

„Путин го зазеде Крим за да го користи како база за опколување на југот. Во 2014 година, тој зазеде дел од истокот за да се подготви за целосна окупација на тие региони“. Тој нагласи дека повлекувањето од Донбас ќе „отвори нови можности“ за Русија за понатамошна агресија.

Зеленски нагласи дека опстанокот на Украина директно одредува каде ќе биде источната граница на Европа. „Ако Украина не издржи, таа граница ќе биде Полска или дури и Германија“, предупреди тој.