Серхио Перез покажа како една лоша одлука може да ти ја расипе кариерата

Мексиканскиот возач Серхио Перез своевремено беше член на неколку различни тимови во текот на својата славна кариера во Формула 1, но патот што го избрал можел да биде сосема поинаков. Тој откри дека на почетокот од кариерата имал сериозна опција да вози за Мерцедес, тимот што подоцна доминираше во Формула 1.

Перез пристигна на Ф1 гридот во 2011 година со тимот Заубер и брзо привлече внимание со импресивни перформанси. Тој веќе имаше освоено три подиуми во сезоната 2012, што го направи еден од најбараните млади возачи во падокот.

Една година подоцна се пресели во Мекларен, каде што возеше заедно со Џенсон Батон, заменувајќи го Луис Хамилтон, кој потоа одлучи да го напушти тимот од Вокинг и да се пресели во Мерцедес.

Сепак, Перез сега откри дека Мекларен не била единствената опција на маса.

Зборувајќи во подкастот „Cracks“, Мексиканецот призна дека работите се движеле екстремно брзо.

• Сè се случило многу брзо. Јас бев најбараниот возач на гридот. Често се случува со младите возачи – кога ќе се појавиш и веднаш ќе постигнеш резултати, сите те сакаат затоа што никој не знае кога ќе го достигнеш врвот, порача Перез.

Потоа Перез откри дека имал три сериозни понуди од големи тимови.

• Имав три различни опции од три големи тима. Едната беше, секако, Ферари, бидејќи стигнав до Формула 1 благодарение на Ферари и нивната академија, откри Мексиканецот.

Логичниот пат беше тој да ја продолжи кариерата во тимот од Маранело, но работите не се одвивале како што треба.

• Беше логично да одам на тој начин, но Ферари не можеше да ми понуди место пред 2014 година. Бев очаен, млад, сè сакаш сега. Ферари беше најдобриот тим за борба за титули, бев очаен, рече тој искрено.

Особено интересен дел од приказната се однесува на Мерцедес и ситуацијата со Луис Хамилтон во тоа време.

Перез откри дека неговиот евентуален премин во Мерцедес зависел од одлуката на Хамилтон.

-И потоа опцијата се појави од никаде. Никогаш не помислив дека ќе возам за Мекларен или Ред Бул, бидејќи тие најчесто користат возачи од нивната академија, додаде Серхио.

Потоа дојде клучен момент што сè промени.

• Мекларен беше нервозен затоа што Хамилтон си заминуваше. И ако Хамилтон не отидеше во Мерцедес, јас имав опција да одам во Мерцедес, вели Перез.

Тоа беше сценарио кое можеше целосно да ја промени неговата кариера. Сепак, Мекларен реагираше брзо и решително.

• Мекларен дојде многу самоуверен, ми понуди договор и јас го прифатив, заклучи Перез.

Сепак, неговата епизода во Мекларен не траеше долго. Разочарувачката сезона доведе до негово заминување од тимот од Вокинг на крајот од таа година.

Гледајќи наназад, јасно е дека еден потег на Луис Хамилтон затвори една, но отвори други врати.

Мерцедес тргна по патот на историска доминација, додека Перез мораше да ја гради својата кариера на тешкиот начин.

Сепак, оваа приказна уште еднаш покажува колку се тенки судбините во Формула 1 и како една одлука може да промени цела кариера.