Седум уапсени во операцијата Армагедон во Србија, споделувале детска порнографија, некои жртви имаат само 4 години

Во операцијата Армагедон, која беше спроведена на неколку локации, 7 лица беа уапсени под сомнение за сторено кривично дело прикажување, добивање и поседување порнографски материјал и експлоатација на малолетно лице за порнографија.

Уапсените се Б. Ф. (1969), П. М. (2002), Д. Н. (1988), Б. Р. (1954), С. С. (1962), П. С. (1962) и М. О. (1982), соопшти Министерството за внатрешни работи.

Се сомнева дека во текот на подолг временски период, тие преземале, складирале и споделувале материјал создаден преку сексуална експлоатација на деца преку DarkWeb, се вели во соопштението.

За време на претресот на становите на осомничените, на електронски уреди беа пронајдени неколку гигабајти фотографии и видеа, на кои се прикажува тешка злоупотреба на деца, во повеќето случаи на возраст меѓу 4 и 14 години, класифицирани по возраст, пол и други параметри.

На осомничените им е одреден притвор до 48 часа и ќе бидат изведени во надлежното обвинителство со кривична пријава. Операцијата ја спроведоа припадници на Министерството за внатрешни работи, Управата за технологија, Службата за борба против високотехнолошки криминал, во соработка со Специјалното одделение за борба против високотехнолошки криминал на Вишото јавно обвинителство во Белград, Управата за криминалистичка полиција и полициските одделенија во Белград, Сомбор, Ниш и Нови Сад.

Операцијата „Армагедон“ испраќа јасна порака дека Министерството за внатрешни работи нема да толерира никаква форма на злоупотреба на деца и дека дигиталниот простор не е анонимно засолниште за сторители на вакви кривични дела, нагласува Министерството за внатрешни работи.